រាជធានីភ្នំពេញ ៖ «សាខាផ្សារថ្មី» ដែលជាសាខាទីពីររបស់តំណាងចែកចាយផលិតផល Samsung KLD ត្រូវបានបើកសម្ពោធជាផ្លូវការក្រោមវត្តមានដ៏ខ្ពង់ខ្ពស់ របស់អគ្គនាយក KLD លោកអេរិច ង៉ោ ថ្នាក់ដឹកនាំជាន់ខ្ពស់របស់ Samsung លោកវ៉ាត់ ឡាំផេង បូករួមទាំងថ្នាក់ដឹកនាំ និងភ្ញៀវកិត្តិយសជាច្រើននាក់ កាលពីថ្ងៃទី២៣ សីហា ២០១២ កន្លងទៅ ។
លោកអេរិច ង៉ោ លើកឡើងថា «មកពីហាងតែមួយផ្គត់ផ្គង់តម្រូវការអត់ទាន់ ទើបយើងសម្រេចចិត្តបើកសម្ពោធហាងមួយទៀត ដើម្បីបំពេញសេចក្តីត្រូវការ និងការជឿជាក់របស់អតិថិជនលើ KLD និងផលិតផល Samsung ដែលយើងកំពុងចែកចាយ ព្រោះអាជីវកម្មរបស់ខ្ញុំរីកចម្រើនជាលំដាប់ ព្រោះខ្ញុំប្រមើលដឹងពីតម្រូវការទីផ្សារ និងស្លាកសញ្ញាដែលខ្លាំង» ។
នាយកសាខាក្រុមហ៊ុន Samsung ថៃប្រចាំកម្ពុជា លោកវ៉ាត់ ឡាំផេង ក៏បានមានប្រសាសន៍ដែរថា ទន្ទឹមនឹងតម្រូវការលើទីផ្សារកាន់តែកើនឡើង បូករួមនឹងភាពជឿជាក់លើស្លាកសញ្ញាផលិតផល Samsung ប្រកបដោយគុណភាពខ្ពស់មិនត្រឹមតែពង្រីកវិសាលភាពចែកចាយតាមរយៈ បង្កើនដៃគូតំណាងចែកចាយកាន់តែច្រើនប៉ុណ្ណោះទេ ប៉ុន្តែដៃគូខ្លួនអាជីវកម្មរបស់ Samsung ខ្លួនឯង ក៏បានពង្រីកសាខារបស់ខ្លួនព្រោងព្រាតដើម្បីបំពេញឱ្យទាន់ និងគ្រប់តម្រូវការរបស់អតិថិជនដែលចេះតែកើនឡើងឥតឈប់ឈរពី មួយថ្ងៃទៅមួយថ្ងៃ ជាក់ស្តែង KLD ជាឧទាហរណ៍ស្រាប់ ។
ឆ្លើយ តបទៅនឹងការរីកចម្រើនរបស់ Samsung រយៈពេលខ្លីនេះអគ្គនាយកក្រុមហ៊ុន KLD បានសង្កត់ធ្ងន់ថា មួយរយៈក្រោយនេះទាំង KLD ក៏ដូចជា Samsung ទាំងមូលទទួលបានជោគជ័យដ៏ត្រចះត្រចង់លើត្រកូល Galaxy ទាំងលើ Smartphon និង Tablet ដូចជា Galaxy Note, Galaxy SII, Galaxy S III, Galaxy Tab, Galaxy Tab 2 10.1 និងជាពិសេស Galaxy Tab 2 7.0 ដែលមានមុខងារហៅចេញបានដូច Smartphone ទូទៅ។
KLD ជាតំណាងចែកចាយផលិតផល Samsung ដំបូងគេបង្អស់នៅកម្ពុជាចាប់តាំងពីខែមេសា ២០១២ មកម៉្លេះ ។ ទីតាំងមុនគេនេះស្ថិតនៅតាមបណ្តោយផ្លូវម៉ៅសេទុង ទល់មុខម៉ុងឌីយ៉ាល់ ។ ដោយមើលឃើញពីភាពជោគជ័យលើការចែកចាយផលិតផល Samsung លើទីផ្សារកម្ពុជា អគ្គនាយករបស់ KLD លោកអេរិច ង៉ោ ក៏បានសម្រេចចិត្តបើក «សាខាផ្សារថ្មី» ដែលមានទីតាំងស្ថិតនៅផ្ទះ លេខ៤០អឺសូន្យ ផ្លូវលេខ៥៣ សង្កាត់ផ្សារថ្មី១ មួយបន្ថែមពីលើសាខាម៉ុងឌីយ៉ាល់ ដើម្បីចាក់បំពេញតម្រូវការអតិថិជន ៕
ចែករំលែកព័តមាននេះ