រាជធានីភ្នំពេញ ៖ នៅថ្ងៃអាទិត្យ ទី២៦ សីហា នេះ ការប្រកួតប្រដាល់ដណ្តើមខ្សែក្រវាត់ K-cement ប្រភេទទម្ងន់៥៤គីឡូក្រាម ពូលB នៅលើសង្វៀនស្ថានីយទូរទស្សន៍ CTN គឺឈានចូលជុំទី២ហើយ ដោយកីឡាករ សារឹម ង៉ា មកពីសមាគមកីឡាប្រដាល់ក្រសួងការពារជាតិ ជួបប្រកួតជាមួយចេង រិទ្ធី មកពីក្លិបសាលវ័ន្តកីឡា។
កាលពីជុំទី១ កីឡាករ អាំង សំអាត មកពីក្លិបតាព្រហ្មមានជ័យ ជាអ្នករកបាន៣ពិន្ទុមុនគេ នៅក្នុងពូល ប៉ុន្តែសម្រាប់លើកនេះ គេមិនទាន់ដឹងថា រវាងកីឡាករ សារឹម ង៉ា និងចេង រិទ្ធី តើនរណាជាអ្នករកបាន៣ពិន្ទុមុនគេទៀតនោះទេ ។ សារឹម ង៉ា និងចេង រិទ្ធី បើពិនិត្យទៅលើសមត្ថភាពបច្ចេកទេសប្រកួតនៅលើសង្វៀនគឺខុសគ្នាបន្តិចបន្តួចប៉ុណ្ណោះ ។ សារឹម ង៉ា ល្អស្នៀតកែង និងជង្គង់ ឯស្នៀតជើងនិងស្នៀតកណ្តាប់ដៃក៏កាន់តែអស្ចារ្យថែមទៀត ។ ទោះបីចលនាវាយចេញរបស់គេមិនសូវរហ័សរហួនប៉ុន្មាន តែកម្រខុសទិសដៅណាស់ ។ សារឹម ងា៉ា ចេះរក្សាកម្លាំងបានល្អ អាចប្រកួតបាន៥ទឹកពេញមិនងាយហត់ទេ ។
ចំណែក ចេង រិទ្ធី វិញបច្ចេកទេសប្រកួតរបស់គេមិនចាញ់ សារឹម ង៉ា ប៉ុន្មានឡើយ ទាំងស្នៀតកណ្តាប់ដៃ និងស្នៀតជើង គឺអាចទាត់ចេញបានយ៉ាងរហ័ស ។ ចលនាវាយលុកមិនរហ័សពេក ហើយក៏មិនយឺតពេក រីឯចិត្តរបស់គេវិញក៏សឿងខ្លាំងណាស់ដែរ ។ គូនេះ មិនធ្លាប់ប៉ះគ្នាពីមុនមកឡើយ ដូច្នេះមានតែរង់ចាំមើល តើអ្នកណាគ្រាន់បើជាងអ្នកណា ។
រីឯគូប្រកួតប្រចាំសប្តាហ៍នេះដែរ វ៉ាន់ ចាន់វេត មកពីក្លិបសិង្ហកីឡា ជួបប្រកួតជាមួយ រឿម វណ្ណៈ មកពីសមាគមកីឡាប្រដាល់ក្រសួងការពារជាតិ ។ កីឡាករ ធា រិទ្ធី មកពីក្លិបអេភូថងកីឡា ជួបប្រកួតជាមួយកីឡាករ លាភ សំណាង មកពីក្លិបកងពលតូចលេខ៧០ ។ កីឡាករ វែ៉ន ជីវ៉ុង មកពីក្លិបកងកេងកីឡាខេត្តបាត់ដំបង ជួបប្រកួតជាមួយកីឡាករ អុី ប៊ុនថា មកពីក្លិបអេភូថងកីឡា ។
កីឡាករ សុខ វាសនា មកពីក្លិបឃ្លាំងមឿងកីឡា ប្រកួតជាមួយកីឡាករ ឆាន់ ជឿន មកពីក្លិបរស្មីកុមារកំព្រា ។ កីឡាករ ហង្ស រស្មី មកពីក្លិបខ្លារខិនគុនខ្មែរ ជួបប្រកួតជាមួយកីឡាករ ធារ៉ា សារ៉ាក់ មកពីក្លិបនិទានសែនជ័យ និងកីឡាករ ម៉ៃ ថៃប៊ិប មកពីក្លិបសមាគមកីឡាប្រដាល់ក្រសួងកសិកម្ម ប្រកួតជាលក្ខណៈសាកលជាមួយកីឡាករ យឹម សាវុធ មកពីក្លិបភ្នំពេជ្រកីឡា ៕
ចែករំលែកព័តមាននេះ