រាជធានីភ្នំពេញ ៖ សមាគមមនុស្សចាស់ត្រូវបានបង្កើតឡើងនូវទូទាំងប្រទេសក្រោមគំនិតផ្តួចផ្តើមដោយរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធានកិត្តិយស និងត្រូវបានបង្កើតឡើងនៅគ្រប់ខេត្ត ក្រុង ស្រុក ខណ្ឌ នៅទូទាំងប្រទេស ។
ដោយឡែកនៅក្នុងខណ្ឌពោធិ៍សែនជ័យ ក៏បានអនុវត្តន៍បង្កើតឡើងនៅតាមបណ្តាសង្កាត់នានាជាបន្តបន្ទាប់បានមួយចំនួនហើយដែរ ។ សន្និបាតបង្កើតសមាគមមនុស្សចាស់នេះបានប្រព្រឹត្តទៅកាលពីព្រឹកថ្ងៃទី២៤ សីហា ២០១២ នៅក្នុងសាលាសង្កាត់កន្ទោក ខណ្ឌពោធិ៍សែនជ័យ ក្រោមអធិបតីភាពលោកសេង គន្ធ អភិបាលរងខណ្ឌពោធិ៍សែនជ័យ និងមានការអញ្ជើញចូលរួមពីសំណាក់លោកយ៉ង់ ស៊ីថុល ចៅសង្កាត់កន្ទោក ព្រមទាំងលោកតា លោកយាយដែលជាមនុស្សចាស់នៅក្នុងមូលដ្ឋានជាច្រើនទៀត ។
លោកយ៉ង់ ស៊ីថុល ប្រធានសមាគមមនុស្សចាស់នៅសង្កាត់កន្ទោក និងជាចៅសង្កាត់កន្ទោកបានថ្លែងឱ្យដឹងថា ទំនៀមទម្លាប់របស់ខ្មែរយើង គឺល្អណាស់ក្នុងការជួយគ្នាទៅវិញទៅមកក្នុងគ្រាមានទុក្ខលំបាក ជាពិសេសការមើលថែ និងជួយដល់មនុស្សចាស់ និងគ្រួសារក្រីក្រនៅក្នុងសង្គមជាតិដែលនេះគឺជាសញ្ញាមួយនាំទៅដល់ការបង្កើតសមាគមមនុស្សចាស់នាពេលនេះ ។ លោកយ៉ង់ ស៊ីថុល បានបន្តថា កាលពីមុនការជួយមនុស្សចាស់ធ្វើឡើងទៅតាមទម្លាប់ពុំមានលក្ខន្តិកៈ ឬរចនាសម្ព័ន្ធច្បាស់លាស់នោះឡើយ បើប្រៀបធៀបជាមួយពេលនេះមានការខុសគ្នាស្រឡះដោយយើងបានបង្កើតជាសមាគមត្រឹមត្រូវដែលធានាបាននូវតម្លាភាពមានការចាត់តាំងត្រឹមត្រូវប្រកបដោយភាពជឿជាក់ និងប្រាកដប្រជា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ