ខេត្តឧត្តរមានជ័យ ៖ រថយន្តកាមរី ស៊េរី៩៥ ពណ៌ខ្មៅ មួយគ្រឿង ដឹកឈើគ្រញូង ដែលអ្នកបើកបរឈ្មោះផា ម៉ាន ភេទប្រុស អាយុ២៥ឆ្នាំ រស់នៅក្នុងភូមិគោកចាស់ ឃុំសសរស្តម្ភ ស្រុកពួក ខេត្តសៀមរាប ត្រូវបានកងរាជអាវុធហត្ថលើផ្ទៃប្រទេស សហការជាមួយមន្ត្រីខណ្ឌរដ្ឋបាលព្រៃឈើខេត្តចាប់បាននៅភូមិវាលឈ្លីក ឃុំពង្រ ស្រុកចុងកាល់ កាលពីវេលាម៉ោង១០ និង៣០នាទីព្រឹកថ្ងៃទី២១ សីហា ឆ្នាំ២០១២ កន្លងទៅនេះ ។
លោកវរសេនីយ៍ត្រី នុត ប៉ូលីន មន្ត្រីកងរាជអាវុធហត្ថលើផ្ទៃប្រទេស និងជាប្រធានក្រុមប្រចាំខេត្តឧត្តរមានជ័យ បានឱ្យដឹងថា មុនពេលធ្វើការចាប់ឃាត់រថយន្តដឹកឈើគ្រញូងនេះ លោកបានធ្វើការស៊ើបអង្កេតឃើញដាក់ឈើពេញ ហើយក៏បានសហការជាមួយមន្ត្រីខណ្ឌរដ្ឋបាលព្រៃឈើខេត្តបង្ក្រាបតែម្តង ។ លោកបានបញ្ជាក់ថា បន្ទាប់ពីធ្វើការបង្ក្រាបរួច រថយន្តកាមរីមួយគ្រឿងនេះ និងឈើគ្រញូងចំនួន៤១ដុំ ឬស្មើជិតមួយម៉ែត្រគូប ព្រមទាំងអ្នកបើកបរបានប្រគល់ទៅឱ្យខណ្ឌរដ្ឋបាលព្រៃឈើខេត្តចាត់ការតាមផ្លូវច្បាប់ ។
ចែករំលែកព័តមាននេះ