ខេត្តបន្ទាយមានជ័យ ៖ នៅសាលប្រជុំនៃស្នងការដ្ឋាននគរបាលខេត្ត កាលពីព្រឹកថ្ងៃទី២២ សីហា មានរៀបចំកិច្ចប្រជុំបូកសរុបលទ្ធផលនៃការអនុវត្តស្តីពីភាពជាដៃគូសហគមន៍ដើម្បីសុវត្ថិភាព ក្នុងការឆ្លើយតបការរីករាលដាលមេរោគអេដស៍ និងជំងឺអេដស៍ ការប្រើបំពានគ្រឿងញៀន ការជួញដូរមនុស្ស និងការពារអនីតិជន ។ កម្មវិធីនេះរៀបចំឡើងដោយលេខាធិការដ្ឋានអេដស៍ក្រសួងមហាផ្ទៃ ឧបត្ថម្ភដោយ USAID/ប្រសិទ្ធិ ក្រោមអធិបតីភាពលោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត ដោយមានការចូលរួមពីតំណាងអង្គភាព និងអង្គការសង្គមស៊ីវិលជាដៃគូពាក់ព័ន្ធជាច្រើនទៀត ។
លោកស្រីនិត សុផា តំណាងអង្គការ FHI 360 បានលើកឡើងពីការចូលរួមរបស់បណ្តាអង្គភាពពាក់ព័ន្ធ ក្នុងការរួមគ្នាផ្សព្វផ្សាយទប់ស្កាត់ពីបញ្ហារីករាលដាលនៃមេរោគអេដស៍ ជំងឺអេដស៍ ការប្រើបំពានគ្រឿងញៀន ការជួញដូរមនុស្ស និងការពារអនីតិជននាពេលកន្លងមក ហើយមកដល់បច្ចុប្បន្នបញ្ហាទាំងនោះបានថយចុះ ។
លោកវេជ្ជបណ្ឌិត ឡេ ច័ន្ទសង្វាត អនុប្រធានមន្ទីរសុខាភិបាលខេត្ត និងលោកវេជ្ជបណ្ឌិត ហ៊ី សុមេធ ប្រធានការិយាល័យអេដស៍ក្រសួងមហាផ្ទៃថ្លែងថា មន្ទីរសុខាភិបាលគឺជាសេនាធិការឱ្យគណៈបញ្ជាការឯកភាពរដ្ឋបាលខេត្ត ហើយកន្លងមកមន្ទីរបានសហការជាមួយដៃគូសហគមន៍ អង្គការនានា ធ្វើកិច្ចការងារខាងផ្សព្វផ្សាយ អប់រំពីបញ្ហាមេរោគអេដស៍ ជំងឺអេដស៍ដល់ប្រជាពលរដ្ឋក្នុងសហគមន៍ និងព្យាបាលអ្នកផ្ទុកមេរោគអេដស៍ ជំងឺអេដស៍ ។ ជាពិសេស ធ្វើការអំពាវនាវដល់ប្រជាពលរដ្ឋក្នុងសហគមន៍ មិនត្រូវរើសអើងអ្នកផ្ទុកមេរោគអេដស៍ ជំងឺអេដស៍ គឺធ្វើយ៉ាងណាត្រូវរួមគ្នាផ្តល់កម្លាំងចិត្តដល់ពួកគាត់ ។ ជាមួយនេះ ចំពោះអ្នកប្រើបំពានគ្រឿងញៀន មន្ត្រីមន្ទីរសុខាភិបាលក៏ធ្វើការព្យាបាលនៅតាមមណ្ឌលក្នុងខេត្ត និងនៅតាមសហគមន៍ផងដែរ ។
លោកវេជ្ជបណ្ឌិត ហ៊ី សុមេធ បញ្ជាក់ថា លេខាធិការដ្ឋានអេដស៍ក្រសួងមហាផ្ទៃ គឺជាសេនាធិការឱ្យក្រសួងមហាផ្ទៃ ហើយភាពជាដៃគូសហគមន៍នេះ បានចាប់ផ្តើមអនុវត្តសាកល្បង នៅខេត្តបន្ទាយមានជ័យ ចាប់តាំងពីឆ្នាំ២០១១ និងកំពុងបន្តរហូតដល់សព្វថ្ងៃនេះ ។ គម្រោងនេះដឹកនាំអនុវត្តដោយលេខាធិការដ្ឋានអេដស៍ក្រសួងមហាផ្ទៃ សហការជាមួយអង្គការ FHI 360 ក្រោមជំនួយថវិកាដោយ USAID តាមរយៈគម្រោងប្រសិទ្ធិ ។ ការអនុវត្តគម្រោងនេះអាចដំណើរការទៅបានរលូន ក៏ដោយសារមានការគាំទ្រពីថ្នាក់ដឹកនាំក្រសួងមហាផ្ទៃ និងថ្នាក់ដឹកនាំខេត្ត ស្នងការដ្ឋាននគរបាលខេត្ត មន្ទីរសុខាភិបាលខេត្ត អាជ្ញាធរដែនដី ព្រមទាំងការចូលរួមរបស់សង្គមស៊ីវិល ម្ចាស់គ្រឹះស្ថាន និងក្រុមគោលដៅយ៉ាងសកម្មផងដែរ ។ គម្រោងនេះមានគោលបំណងដើម្បីបង្កើនបរិយាកាសគាំទ្រទៅដល់ក្រុមប្រជាជនដែលប្រឈមមុខខ្ពស់ក្នុងការទទួលបានព័ត៌មានពីមេរោគអេដស៍ ជំងឺអេដស៍ ការប្រើបំពានគ្រឿងញៀន សុខភាពបន្តពូជ និងសុខភាពផ្លូវភេទ ស្រោមអនាម័យ ការទទួលបាននូវសេវាសុខភាពសង្គម និងអាចរស់នៅក្នុងបរិយាកាសដែលមិនមានការបៀតបៀនពីអំពើផ្លូវភេទ ។
មានប្រសាសន៍បើកកិច្ចប្រជុំ លោកឧត្តមសេនីយ៍ត្រី ខេង ស៊ុម ស្នងការនគរបាលខេត្តបានវាយតម្លៃខ្ពស់ចំពោះកិច្ចសហប្រតិបត្តិការយកចិត្តទុកដាក់របស់ភាពជាដៃគូសហគមន៍ រួមគ្នាទប់ស្កាត់ការរីករាលដាលមេរោគអេដស៍ ជំងឺអេដស៍ ការប្រើបំពានគ្រឿងញៀន ការជួញដូរមនុស្ស និងការពារអនីតិជន ។ ទន្ទឹមនោះយើងទាំងអស់គ្នាក៏ត្រូវរួមគ្នាទប់ស្កាត់ជំងឺគ្រុនចាញ់ផងដែរ ពិសេសកម្លាំងនគរបាលដែលឈរជើងតាមខ្សែបន្ទាត់ព្រំដែន ។ លោកស្នងការបានបញ្ជាក់ថា រាល់កិច្ចការអ្វីៗសម្រេចទៅបានគឺអាស្រ័យទៅលើសុខភាព បើសុខភាពយើងទ្រុឌទ្រោមហើយនោះ ទោះបីជាកិច្ចការនោះស្រាលក៏មិនអាចសម្រេចបានឡើយ ៕
ចែករំលែកព័តមាននេះ