រាជធានីភ្នំពេញ ៖ ដោយមានបំណងចង់បង្កើតកិច្ចសហប្រតិបត្តិការលើវិស័យសុខាភិបាលជាមួយមន្ទីរពេទ្យកុមារជាតិ គណៈប្រតិភូមន្ទីរពេទ្យ PHYA THAIទី២ នៅទីក្រុងបាងកក ប្រទេសថៃ បានអញ្ជើញមកបំពេញទស្សនកិច្ចនៅមន្ទីរពេទ្យកុមារជាតិកាលពីថ្ងៃទី២៣ សីហា ដោយនាំមកជាមួយនូវអំណោយជាភួយចំនួន១០០ ផងដែរ ដើម្បីប្រគល់ជូនមន្ទីរពេទ្យកុមារជាតិ ក្រោមអធិបតីភាពលោកសាស្ត្រាចារ្យ ម៉ម វិទ្យារិទ្ធ ប្រធានការិយាល័យបច្ចេកទេស និងជាគ្រូពេទ្យវះកាត់នៅមន្ទីរពេទ្យកុមារជាតិ ។
នៅក្នុងកិច្ចពិភាក្សា គណៈប្រតិភូថៃបានថ្លែងឱ្យថា ជារៀងរាល់ឆ្នាំគណៈប្រតិភូមន្ទីរពេទ្យ PHYA THAI ទី២ តែងតែមកបំពេញទស្សនកិច្ចនៅព្រះរាជាណាចក្រកម្ពុជា ចុះសាកសួរសុខទុក្ខអ្នកជំងឺកម្ពុជាដែលបានអញ្ជើញទៅព្យាបាលជំងឺនៅមន្ទីរពេទ្យ PHYA THAI ថា តើពួកគេមានសេចក្តីសុខទុក្ខយ៉ាងណា ហើយជាសះស្បើយហើយឬនៅ ។ ម៉្យាងទៀតនៅក្នុងដំណើរបំពេញទស្សនកិច្ចនោះ គណៈប្រតិភូមន្ទីរពេទ្យPHYA THAI តែងតែនាំមកជាមួយនូវអំណោយជាភួយដើម្បីផ្តល់ជូនដល់ស្ថាប័នធំៗមួយចំនួននៅក្នុងប្រទេសកម្ពុជាមានដូចជា ខុទ្ទកាល័យព្រះបរមរាជវាំង រាជបណ្ឌិត្យសភាកម្ពុជា កាកបាទក្រហមកម្ពុជា ហើយពេលនេះ គឺនាំយកមកជូនមន្ទីរពេទ្យកុមារជាតិ ដើម្បីស្វែងយល់ពីស្ថានភាពរបស់មន្ទីរពេទ្យកុមារជាតិថាតើមានបញ្ហាអ្វីខ្លះ ដែលមន្ទីរពេទ្យ PHYA THAI ទី២អាចជួយបាននៅពេលអនាគត ។ មន្ទីរពេទ្យ PHYA THAI ទី២ ជាមន្ទីរពេទ្យដ៏ធំមួយនៅក្នុងទីក្រុងបាងកក មានកេរ្តិ៍ឈ្មោះបោះសំឡេងក្នុងការមើលថែទាំស្ត្រី និងទារក ដោយក្នុងមួយខែៗមានស្ត្រីចំនួនជាង១០០នាក់ បានសម្រាលកូននៅក្នុងមន្ទីរពេទ្យនេះ ក្នុងនោះក៏មានស្រ្តីទៅពីប្រទេសកម្ពុជាមួយចំនួនដែរ ។
លោកសាស្ត្រាចារ្យ ម៉ម វិទ្យារិទ្ធ បានជម្រាបជូនគណៈប្រតិភូអំពីស្ថានភាពព្យាបាលអ្នកជំងឺនៅក្នុងមន្ទីរពេទ្យកុមារជាតិថា មន្ទីរពេទ្យកុមារជាតិទទួលព្យាបាលកុមារដែលមានជំងឺទាំងធ្ងន់ ទាំងស្រាល និងមានវះកាត់ផងដែរ ជាពិសេសគឺបញ្ហាមិនលូតលាស់ ។ ការពិត មន្ទីរពេទ្យកុមារជាតិត្រូវបានបង្កើតឡើងនៅឆ្នាំ១៩៧៤-១៩៧៥ តែមិនទាន់បានដំណើរការផង ស្រុកទេសក៏ត្រូវខ្មែរក្រហមកាន់កាប់ ហើយក្រោយថ្ងៃរំដោះឆ្នាំ១៩៧៩ មន្ទីរពេទ្យនេះ ក៏បានដាក់ឱ្យដំណើរការដែលពេលនោះមានគ្រូពេទ្យតែម្នាក់គត់សម្រាប់ធ្វើការជាក្រុមជាមួយក្រុមបេសកកម្មរបស់អង្គការទស្សនៈពិភពលោក៤រូប ។ បច្ចុប្បន្ន មន្ទីរពេទ្យកុមារជាតិបានទទួលការអនុញ្ញាតពីរាជរដ្ឋាភិបាលឱ្យប្រែក្លាយជាគ្រឹះស្ថានសាធារណៈរដ្ឋបាល ៕
ចែករំលែកព័តមាននេះ