ខេត្តកំពត ៖ រថយន្តសាំយ៉ុងពណ៌លឿងមួយគ្រឿងដឹកអ្នកដំណើរជាង១០នាក់បានបុកគ្នាជាមួយរថយន្តកូរ៉េចំណុះ២តោនកន្លះមួយគ្រឿងមិនស្គាល់ម៉ាក កាលពីវេលាម៉ោង៤រសៀលថ្ងៃទី២១ សីហា នៅលើដងផ្លូវជាតិលេខ៣១ ត្រង់ចំណុចភូមិជ្រោះតាសោម ឃុំប្រាសាទភ្នំខ្យង ស្រុកកំពង់ត្រាច បណ្តាលឱ្យអ្នកបើករថយន្តសាំយ៉ុងរបួសស្រាល ឯរថយន្តកូរ៉េនោះបានបើករត់បាត់ ។
លោក ទុំ ទិត្យ ជាមន្ត្រីនគរបាលទទួលបន្ទុកចរាចរណ៍ស្រុកបានឱ្យដឹងថា រថយន្តម៉ាកសាំយ៉ុងពណ៌លឿងមួយគ្រឿងផ្ទុកអ្នកដំណើរជាង១០នាក់ បើកបរតាមបណ្តោយផ្លូវជាតិលេខ៣១ ក្នុងទិសដៅពីជើងទៅត្បូង ឯរថយន្តកូរ៉េចំណុះ២តោនកន្លះដឹកផ្លែដូងបើកបញ្ច្រាសទិសគ្នាពីត្បូងទៅជើងស្រាប់តែមកដល់ចំណុចខាងលើដោយសារគេចជង្ហុកបណ្តាលឱ្យរថយន្តទាំង២គ្រឿងបុកគ្នាប្រាវតែម្តង ។ រថយន្តសាំយ៉ុង រងការខូចផ្នែកខាងមុខ ហើយបានរេចង្កូតធ្លាក់ថ្នល់បណ្តាលឱ្យអ្នកបើករថយន្តសាំម៉ុងរងរបួសស្រាល ចំណែករថយន្តកូរ៉េដឹកដូងមិនមានខូចខាតអ្វីទេ ហើយបើកគេចបាត់ ។
លោក ទុំ ទិត្យ បន្តថា អ្នកធ្វើដំណើរតាមរថយន្តសាំម៉ុងមិនមានគ្រោះថ្នាក់ទេ តែម្នាក់ៗភ័យព្រលឹងចុងសក់គ្រប់គ្នាចំពោះរថយន្តកូរ៉េដែលបើកគេចនោះបើទោះជាកម្លាំងនគរបាលបានសហការគ្នាស្ទាក់យ៉ាងណាគឺមិនឃើញដែរ ៕
ចែករំលែកព័តមាននេះ