ខេត្តព្រះសីហនុ ៖ កាលពីវេលាម៉ោង៦និង៤០នាទីព្រឹកថ្ងៃទី២៤ សីហា មានគ្រោះថ្នាក់ចរាចរណ៍មួយកើតឡើងរវាងរថយន្តនិងរ៉ឺម៉កម៉ូតូបណ្តាលឱ្យមនុស្សជិះលើរ៉ឺម៉កម៉ូតូរបួសធ្ងន់៥នាក់និងស្រាលម្នាក់ ។ ហេតុការណ៍នោះកើតឡើងតាមបណ្តោយផ្លូវជាតិលេខ៤ត្រង់ចន្លោះគីឡូម៉ែត្រលេខ១៩៤-១៩៥ ស្ថិតក្នុងភូមិអូរចំណាឃុំអូរឧកញ៉ាហេង ស្រុកព្រៃនប់ ។
តាមប៉ូលិសចរាចរស្រុកព្រៃនប់បានឱ្យដឹងថា គ្រោះថ្នាក់នេះបានកើតឡើងរវាងរថយន្ត១គ្រឿងម៉ាកកូរូ៉ឡាពណ៌ស ជារថយន្តរត់តាក់ស៊ីបើកពីវាលរេញទៅខេត្តព្រះសីហនុ បើកបរដោយឈ្មោះ ខាន់ បិប ភេទប្រុស អាយុ២៥ឆ្នាំមានទីលំនៅភូមិជើងគោ ឃុំជើងគោ ស្រុកព្រៃនប់បានបុកគ្នាជាមួយរ៉ឺម៉កម៉ូតូមួយគ្រឿងដឹកមនុស្សទៅស្ទូងដែលកំពុងបើកបរស្របទិសគ្នាបណ្តាលឱ្យអ្នកជិះលើរឺុម៉កម៉ូតូ៥នាក់ និងអ្នកបើកបរម៉ូតូម្នាក់រងរបួស ។ ប៉ូលិសបានបន្តទៀតថា ជនរងគ្រោះ ក្នុងហេតុការណ៍ខាងលើមាន ១-ឈ្មោះនួន រឿន ភេទប្រុស អាយុ៤៩ឆ្នាំ ជាកសិករ ជាអ្នកបើកបរម៉ូតូរសណ្តោងរ៉ឺម៉ករបួសធ្ងន់ ២-ឈ្មោះអូ លី ភេទស្រី អាយុ៥៧ឆ្នាំ ជាកសិកររបួសធ្ងន់ ៣-ឈ្មោះចៅ នឹង ភេទស្រីអាយុ៦៦ឆ្នាំ ជាកសិកររបួសធ្ងន់ ៤-ឈ្មោះញ៉ែម យន ភេទស្រី អាយុ៥៤ឆ្នាំជាកសិកររបួសធ្ងន់ ៥-ឈ្មោះកេន អ៊ីម ភេទស្រីអាយុ៣១ឆ្នាំ ជាកសិកររបួសធ្ងន់ និង៦-ឈ្មោះ គុណ ភេទស្រី អាយុ៤៥ឆ្នាំ ជាកសិកររបួសស្រាល ទាំង៦នាក់មានទីលំនៅភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ។
តាមព័ត៌មាននៅក្បែរកន្លែងកើតហេតុបានឱ្យដឹងថា មុនកើតហេតុរថយន្តតាក់ស៊ីខាងលើបានបើកបរសំដៅទៅខេត្តព្រះសីហនុ លុះទៅ ដល់ចំណុចកើតហេតុ រថយន្តនោះបានបើកវ៉ារថយន្តមួយទៀត ដែលបើកពីមុខហើយខណៈនោះរ៉ឺម៉កម៉ូតូបត់ឆ្វេងក៏ត្រូវរថយន្តខាងលើបុកតែម្តង ៕
ចែករំលែកព័តមាននេះ