នាវាបោសសំអាតមីនឈ្មោះ BELLIS របស់កងម៉ារីន បែលហ្ស៊ិក និងនាវាបោសសំអាតមីនហូឡង់ ឈ្មោះ WILLEMSTAD កាលពីថ្ងៃទី២៣ សីហា បានបំផ្លាញគ្រឿងផ្ទុះទី១០០០ ហើយក្នុងសមុទ្រខាងជើងនៅដែនទឹកហូឡង់។គ្រាប់ផ្ទុះទី១០០០ដែលត្រូវកម្ទេចចោលនេះ ជាគ្រាប់បែកទម្លាក់ពីយន្តហោះ១គ្រាប់មានប្រវែង១,៣ម៉ែត្រ និងវិជ្ជមាត្រ៤០សង្ទីម៉ែត្រ ដែលរកឃើញកាលពីខែមករាកន្លងមកនេះ ដោយនាវាហូឡង់មួយគ្រឿងឈ្មោះ EBEN HAEZER ។
សកម្មភាពនេះស្ថិតក្នុងក្របខណ្ឌនៃកិច្ចព្រមព្រៀងទ្វេភាគីមួយមានឈ្មោះថា BENEFICIAL COOPERATION រវាងបែលហ្ស៊ិក និងហូឡង់ ដែលបានសន្យាចាប់តាំងពីឆ្នាំ២០០៥ មករក្សាសន្តិសុខក្នុងដែនទឹក របស់ប្រទេសទាំង២ប្រឆាំងគ្រឿងផ្ទុះ ដែលបន្សល់ទុកពីសង្គ្រាមលោកលើកទីមួយ និងសង្គ្រាមលោកលើកទី២ ។
ស្ទើរតែរៀងរាល់ថ្ងៃ បណ្តានាវានេសាទហូឡង់ ឬបែលហ្ស៊ិក បានរកឃើញបណ្តាកាកសំណល់នៃគ្រាប់រំសេវក្នុងសំណាញ់របស់ពួកគេ។ គ្រឿងផ្ទុះទាំងនេះ នៅមានគ្រោះថ្នាក់ ទោះបីជាវាស្ថិតនៅក្នុងទឹករយៈពេលជាងកន្លះសតវត្ស មកហើយក្តី ។ កាលពីខែមេសា ឆ្នាំ២០០៥ គ្រាប់បែកសម័យសង្គ្រាមលោកទី២មួយគ្រាប់ របស់អាមេរិកត្រូវជាប់សំណាញ់នាវានេសាទហូឡង់មួយគ្រឿងឈ្មោះ MAATEN JAWB ហើយវាបានផ្ទុះលើនាវានេះ បណ្តាលឱ្យមនុស្សស្លាប់៣នាក់ ក្នុងចំណោមក្រុមនាវិកហើយនាវានោះរងការខូចខាតខ្លាំង ៕
ចែករំលែកព័តមាននេះ