ខេត្តកំពង់ឆ្នាំង ៖ រថយន្តធុនធ្ងន់ដឹកជីមួយគ្រឿងបានធ្លាក់ចេញពីផ្លូវចុះទៅប្រាស់ដេកក្នុងប្រឡាយទឹកកាលពីវេលាម៉ោង១១និង៥០នាទីយប់ថ្ងៃទី២៣ សីហា នៅតាមបណ្តោយផ្លូវជាតិលេខ៥ ត្រង់ចំណុចភូមិថ្មី ឃុំជ្រៃបាក់ ស្រុករលាប្អៀរ ខណៈដែលអ្នកបើកបរងងុយដេកងោកមួយភាំង ។ ទោះបីយ៉ាងណាមិនមាននរណាម្នាក់រងរបួសក្នុងហេតុការណ៍នោះទេ ។
តាមមន្ត្រីប៉ូលិសដែលបានចុះទៅពិនិត្យដល់កន្លែងកើតហេតុឱ្យដឹងថា រថយន្តដែលក្រឡាប់ធ្លាក់ប្រឡាយនោះម៉ាកហ៊្វុយហ្សូ ដឹកជីយ៉ាងពេញចេញពីភ្នំពេញ ឆ្ពោះទៅខេត្តបន្ទាយមានជ័យ ប៉ុន្តែពេលមកដល់ចំណុចកើតហេតុមិនដឹងជាយ៉ាងម៉េច ស្រាប់តែរេចង្កូតចេញពីផ្លូវធ្លាក់ទៅខាងស្តាំដៃ ក្រឡាប់ប្រាស់ដេកក្នុងប្រឡាយតែម្តង ។ តាមការពិនិត្យរបស់ប៉ូលិសសន្និដ្ឋានថា អ្នកបើករថយន្តអាចនឹងងោក ទើបបណ្តាលឱ្យធ្លាក់ចេញពីថ្នល់បែបនេះ ។ ក្រោយពេលកើតហេតុម្ចាស់រថយន្តបានហៅឡានស្ទូច បន្តដំណើរទៅមុខទៀតដោយមិនរំខានដល់សមត្ថកិច្ចឡើយ ៕
ចែករំលែកព័តមាននេះ