រដ្ឋតាស្មានី (Tasmania) របស់អូស្ត្រាលីបានពិចារណាដាក់បម្រាមលក់បារីដល់ប្រជាជនដែលចាប់កំណើតក្រោយឆ្នាំ២០០០ ដោយចាត់ទុកថាជាកិច្ចខំប្រឹងប្រែងរបស់រដ្ឋបាលថ្នាក់តំបន់របស់អូស្ត្រាលី ក្នុងការបង្កើតបរិស្ថានគ្មានបារីក្នុងពេលអនាគត ។
នៅក្នុងរបាយការណ៍បញ្ជាក់ថា សភាក្នុងរដ្ឋតាស្មានីបានផ្តល់សំឡេងជាឯកច្ឆន្ទលើសំណើរបស់លោកអាយវេន ឌីន ជាសមាជិកសភា ។ បម្រាមនេះអនុវត្តទៅលើបុគ្គលដែលកើតក្រោយឆ្នាំ២០០០ទាំងអស់ នឹងចូលជាធរមានឱ្យប្រើប្រាស់ជាផ្លូវការចាប់ពីឆ្នាំ២០១៨ ឬរយៈពេល៦ឆ្នាំខាងមុខ ។
នេះជាលើកដំបូងនៅលើសាកលលោកដែលការហាមលក់បារីដោយវិធីសាស្ត្រឈរលើឆ្នាំកំណើតរបស់អ្នកប្រើប្រាស់ ។ តាមរបាយការណ៍ថា មានប្រទេសជាច្រើនដូចជា សិង្ហបុរី និងហ្វាំងឡង់ កំពុងពិភាក្សាពីដំណើរការក្នុងការអនុវត្តបទដ្ឋាននោះដូចគ្នា ។
លោក អាយវេន ឌីន សមាជិកសភាដែលជាម្ចាស់គោលគំនិតនោះ បង្ហើបឱ្យដឹងថា «បទដ្ឋាននេះនឹងការពារមិនឱ្យមនុស្សជំនាន់ក្រោយរបស់យើងក្លាយជាទាសកររបស់បារី ។
ពួកយើងជាមនុស្សសម័យថ្មីដែលរួចផុតពីគំនាបផលិតផលថ្នាំជក់ទាំងស្រុង» ។
ជំហររបស់អាជ្ញាធរក្នុងរដ្ឋតាស្មានី កើតមានរយៈពេលតែ១សប្តាហ៍ ក្រោយពីតុលាការអូស្ត្រាលីសម្រេចលុបចោលបណ្តឹងរបស់តំណាងក្រុមហ៊ុនផលិតបារីជាច្រើននាក់ ដែលស្នើសុំដល់អាជ្ញាធរលុបចោលបទដ្ឋានដ៏តឹងរ៉ឹង ដោយបញ្ជាក់ថា ត្រូវលក់ផលិតផលថ្នាំជក់ក្នុងកញ្ចប់លាតគ្មានស្លាកយីហោទំនិញរបស់អ្នកផលិត ឬការឃោសនាផ្សព្វផ្សាយ ។
បច្ចុប្បន្នរដ្ឋតាស្មានី ចាត់ទុកថាជារដ្ឋដែលមានអត្រាអ្នកជក់បារីខ្ពស់បំផុតនៅអូស្ត្រាលី ដោយទិន្ន័យរបស់អាជ្ញាធរបញ្ជាក់ថា បច្ចុប្បន្នមានជាង១ភាគ៤នៃប្រជាជននៅក្នុងរដ្ឋក្លាយជាទាសកររបស់បារី ៕
ចែករំលែកព័តមាននេះ