ទូរទស្សន៍ប៉ាគីស្ថាន GEO រាយការណ៍កាលពីថ្ងៃទី២៣ សីហា ថា មនុស្សយ៉ាងតិច៣២នាក់ បានត្រូវស្លាប់ ដោយសារភ្លៀងធ្លាក់ខ្លាំង និងទឹកជំនន់ក្នុងតំបន់ភាគពាយ័ព្យ ភាគខាងកើត និងភាគខាងជើងប៉ាគីស្ថាន រយៈពេល២៤ម៉ោង ចុងក្រោយនេះ ។
តំបន់ដែលរងការប៉ះពាល់ខ្លាំងជាងគេបំផុត គឺខេត្ត KHYBER PAKHTUNKHWA ភាគពាយ័ព្យប្រទេស ។
ក្នុងស្រុក NOWSHERA នៃខេត្តនេះ មានមនុស្សស្លាប់ដល់ទៅ៩នាក់ ហើយមនុស្ស១១នាក់ទៀត ត្រូវរបួសដោយសារទឹកស្ទឹងមួយបានជោរជន់ ពេលមានភ្លៀងធ្លាក់យ៉ាងខ្លាំង ។ ម្យ៉ាងវិញទៀត នៅខេត្តនេះដែរ គឺក្នុងស្រុក MANSEHRA ផ្ទះជាច្រើន ខ្នងត្រូវរលំបាក់ ដោយសារទឹកជំនន់ ដែលសម្លាប់ប្រជាជន៦នាក់ និងរបួស១១នាក់។ អាជ្ញាធរខេត្ត និងស្រុក បានចេញការប្រកាសអាសន្ន ក្នុងតំបន់រងគ្រោះ ហើយបានធ្វើប្រតិបត្តិការជួយសង្គ្រោះ ។
ទឹកជំនន់នៅបាននាំយកមនុស្សយ៉ាងតិច៤នាក់ ក្នុងតំបន់កុលសម្ព័ន្ធភាគ ពាយ័ព្យប្រទេស ព្រមទាំងមនុស្ស២នាក់ទៀត ក្នុងនោះមានកុមារម្នាក់ក្នុងតំបន់ទំនាបនៅកាស្មៀរប៉ាគីស្ថាន ។ ស្ទើររៀងរាល់ឆ្នាំនារដូវភ្លៀងចាប់ពីខែកក្កដា ទៅខែកញ្ញា ប៉ាគីស្ថានត្រូវប្រឈមមុខនឹងគ្រោះទឹកជំនន់ ។ កាលពីឆ្នាំ២០១០ប្រទេសនេះ រងគ្រោះដោយទឹកជំនន់ធ្ងន់ធ្ងរបំផុតបណ្តាលឱ្យមនុស្សស្លាប់ដល់ទៅ១៥៤០នាក់ និងរបួស២០៨៨នាក់ ផ្ទះ៥៥៧២២៦ខ្នង រងការបំផ្លាញ ហើយមនុស្ស៦លាននាក់ភៀសខ្លួន ។
ក្នុងឆ្នាំ២០១១ ទឹកជំនន់សម្លាប់មនុស្ស២៧០នាក់ ក្នុងខេត្ត SINDH ភាគខាងត្បូងប្រទេស ខណៈមនុស្សយ៉ាងតិច៥,៣លាននាក់ភៀសខ្លួនហើយផ្ទះ១,២លានខ្នងរងការបំផ្លាញ ៕
ចែករំលែកព័តមាននេះ