ខេត្តស្វាយរៀង ៖ លោកឧត្តមសេនីយ៍ត្រីប្រាជ្ញ រឹម ស្នងការនគរបាលខេត្ត បានមានប្រសាសន៍ធ្ងន់ៗនៅក្នុងពិធីផ្លាស់ប្តូរ ផ្ទេរមុខតំណែង និងបំពាក់ឋានន្តរស័ក្តិដល់នាយនគរបាលកាលពីថ្ងៃទី២៣ សីហា នៅចំពោះមុខលោកអធិការ-អធិការរងស្រុក-ក្រុង នាយប៉ុស្តិ៍រដ្ឋបាល ឃុំ-សង្កាត់ និងនាយការិយាល័យនគរបាលខេត្តទាំងអស់ថា បញ្ហាកុងត្រូលជជុះ បើមន្ត្រីនគរបាលដាក់កុងត្រូលជជុះជំរិតទារលុយពីប្រជាពលរដ្ឋត្រូវតែដកជាបន្ទាន់ បើកមិនដកទេត្រូវតែទទួលខុសត្រូវ និងដកចេញពីមុខតំណែង ។
លោកប្រាជ្ញ រឹម មានប្រសាសន៍ថា ល្មមដល់ពេលហើយ កន្លងមកកុងត្រូលជជុះនៅតាមខ្សែបន្ទាត់ព្រំដែនមានភាពរញ៉េរញ៉ៃខ្លាំងណាស់ ដោយលោកលើកយកមកជម្រាបចំៗតែម្តង ទី១-ប៉ុស្តិ៍ដូង មាន៥ស្ថាប័នដែលដាក់ចម្ងាយ៤០០ម៉ែត្រពីព្រំដែន«មានភាស៊ីស្រុក ខេត្ត នគរបាលសេដ្ឋកិច្ច ទាហាន គយ»។ ទី២-ប៉ុស្តិ៍ត្រឡោកបែក មានប៉ុស្តិ៍រដ្ឋបាលឃុំដាក់កុងត្រូលយកលុយ ។ ទី៣-ប៉ុស្តិ៍ថ្នាថ្នង់ ស្រុករំដួល មានដាក់កុងត្រូលជជុះ ៧ស្ថាប័ន«ភាស៊ីស្រុក ខេត្ត នគរបាលសេដ្ឋកិច្ច ទាហាន វិភាគទាន គយ កាំកុងត្រូល»។ ទី៤-ក្រុងបាវិតប៉ុស្តិ៍ធ្លកមាន៥អង្គភាព«ភាស៊ីស្រុក វិភាគទានខេត្ត ទាហាន នគរបាលមានទាំងប្រជាពលរដ្ឋដាក់កុងត្រូលដែរ» ។ ទី៥-ប៉ុស្តិ៍កំពង់ស្ពាន មានភាស៊ីក្រុង វិភាគទានខេត្ត ប៉េអឹម ។ ទី៦-ស្រុកកំពង់រោទ៍ ប៉ុស្តិ៍សំយោ៉ងមាន«គយ ភាស៊ី វិភាគទាន នគរបាលសេដ្ឋកិច្ច ទាហាន ។ ទី៧-ឃុំក្រួស ស្រុកស្វាយជ្រំមានដាក់បារ៉ស់កាត់ផ្លូវចំនួន៣«គឺមានទាហាន នគរបាល ភាស៊ីស្រុក វិភាគទាន »។ ទី៨-នៅច្រកតានូ មន្ត្រីគយបានឱ្យមន្ត្រីនគរបាលប៉ុស្តិ៍រដ្ឋបាលដាក់កុងត្រូលជំនួស ដូច្នេះសូមឈប់ជាបន្ទាន់ ។
លោកប្រាជ្ញ រឹម បានប្រកាសថា វិធានការនេះគឺចាប់អនុវត្តពីថ្ងៃប្រកាសនេះទៅ កុងត្រូលជជុះទាំងអស់ បើកម្លាំងបង្ក្រាបចុះទៅចាប់បានត្រូវតែទទួលខុសត្រូវ ។ លោកប្រាជ្ញ រឹម បានបញ្ជាក់ថា ការបង្ក្រាបកុងត្រូលជជុះនេះធ្វើឡើងតាមបទបញ្ជារបស់សម្តេចអគ្គមហាសេនាបតីតេជោ ហ៊ុន សែន ក្នុងការអនុវត្តគោលនយោបាយភូមិ-ឃុំមានសុវត្ថិភាព ដោយបន្ថែម៤ចំណុចទៀតគឺ១-កុងត្រូលជជុះ ២-គ្រោះមហន្តរាយ ៣-គ្រោះថ្នាក់ចរាចរណ៍ និង៤-យុទ្ធភណ្ឌមិនទាន់ផ្ទុះ។ កុងត្រូលជជុះនេះធ្វើឱ្យប្រជាពលរដ្ឋមានការថ្នាំងថ្នាក់ ដូច្នេះត្រូវតែបពា្ឈប់ជាបន្ទាន់ ៕
ចែករំលែកព័តមាននេះ