ខេត្តបន្ទាយមានជ័យ ៖ ទំនប់មួយកន្លែងដែលសាងសង់ពីថ្មកាត់អូរព្រំដែនត្រង់ចំណុចភូមិបន្ទាយទី២ ឃុំអូរសំព័រ ស្រុកម៉ាឡៃ ទល់មុខភូមិបាណយ ឃុំផាន់សិទ្ធ ស្រុកអារញ្ញប្រាថេត ខេត្តស្រះកែវ ប្រទេសថៃ ត្រូវបានអាជ្ញាធរថៃស្នើសុំអាជ្ញាធរកម្ពុជាជួសជុល ។ បន្ទាប់ពីមានសំណើនេះ នាវេលាម៉ោង១និង៣០នាទីរសៀលថ្ងៃទី២០ សីហា លោកឯម សុខា អភិបាលស្រុកម៉ាឡៃ បានដឹកនាំមន្ត្រីមួយចំនួនចុះទៅត្រួតពិនិត្យទំនប់ទឹកនោះ ។
លោកវរសេនីយ៍ទោ ឈិត លី មេបញ្ជាការវរសេនាតូចនគរបាលការពារព្រំដែនលេខ៨១៥ ប្រចាំការនៅស្រុកម៉ាឡៃឱ្យដឹងថា អាជ្ញាធរថៃបានស្នើជួសជុល ទំនប់ទឹកថ្មីនៅចំណុចខាងលើ នៅក្នុងកិច្ចប្រជុំរវាងអាជ្ញាធរស្រុកម៉ាឡៃ និងស្រុកអារញ្ញប្រាថេត កាលពីថ្ងៃទី១៥ សីហា ដែលរៀបចំធ្វើឡើងនៅស្រុកអារញ្ញប្រទេសថៃ ។ គ្រានោះខាងអាជ្ញាធរកម្ពុជា បញ្ជាក់ថា ថ្នាក់ក្រោមមិនហ៊ានអនុញ្ញាតឱ្យធ្វើការជួសជុលបានទេ ពីព្រោះថា វាពាក់ព័ន្ធ នឹងអនុស្សរណៈ គឺមានតែថ្នាក់លើទេ ទើបមានសិទ្ធិសម្រេច ។ ដូច្នេះមិនមានភាគីណាមួយមានសិទ្ធិសាងសង់ ឬជួសជុលនោះឡើយ រង់ចាំទុកឱ្យថ្នាក់លើនៃប្រទេសទាំងពីរប្រជុំពិភាក្សា និងធ្វើការដោះស្រាយគ្នាសិន ។
លោកមេបញ្ជាការ បានបន្តទៀតថា ទំនប់ទឹកនោះមានទទឹងប្រហែល៥ម៉ែត្រ បណ្តោយប្រហែល២០ម៉ែត្រ កម្ពស់៣ម៉ែត្រ ត្រូវបានភាគីថៃលួចសាងសង់ក្នុងអំឡុងពេលប្រទេសកម្ពុជាមានសង្គ្រាម ហើយគេសាងសង់ឡើងដើម្បីយកទឹកទៅស្រោចស្រពដីស្រែចម្ការរបស់កសិករថៃ ។ ជាងនេះទៅទៀត ការកសាងទំនប់ទឹកនោះ ធ្វើឱ្យទឹកអូរនៅផ្នែកខាងក្រោមមានការរីងស្ងួត និងមានផលប៉ះពាល់មួយចំនួនដល់ប្រជាជននៅខាងក្រោម បណ្តាលឱ្យខ្វះខាតទឹកសម្រាប់ប្រើប្រាស់ផ្នែកកសិកម្ម ។ បន្ទាប់ពីមានការស្នើសុំពីភាគីថៃ សុំជួសជុលទំនប់ទឹកនេះឡើងវិញ ទើបនៅរសៀលថ្ងៃទី២០ សីហា លោកឯម សុខា អភិបាលស្រុកម៉ាឡៃបានដឹកនាំមន្ត្រីមួយចំនួនទៅត្រួតពិនិត្យជាក់ស្តែង ដើម្បីរាយការណ៍ជូនថ្នាក់លើ ។
ពាក់ព័ន្ធនឹងបញ្ហានេះ ការទាក់ទងទៅលោក ឯម សុខា អភិបាលស្រុកម៉ាឡៃ ដើម្បីសុំការបំភ្លឺលោកបានប្រាប់ថា កំពុងជាប់រវល់ប្រជុំ ។ គួរបញ្ជាក់ថា កាលពីថ្ងៃទី២ ឧសភា កន្លងទៅនេះ ថៃបានសាងសង់បដិមាជិតអូរព្រំដែន បើទោះបីជាភាគីកម្ពុជាស្នើសុំឱ្យផ្អាកក៏ភាគីថៃនៅតែបន្តធ្វើទាល់តែរួចរាល់ ដោយពួកគេមិនសូវជាគោរព អនុស្សរណៈប៉ុន្មានទេ ៕
ចែករំលែកព័តមាននេះ