ខេត្តពោធិ៍សាត់ ៖ អ្នកក្រុងពោធិ៍សាត់ចំនួន៣២១គ្រួសារដែលរស់នៅដីម្តុំអតីតផ្លូវយន្តហោះ ភូមិចំការចេកខាងជើង ដីច្រមុះជ្រូកផ្សារចាស់ ភូមិពាលញែក១ ដីខាងក្រោយមន្ទីរពេទ្យ ដីខាងក្រោយសាលាខេត្ត និងដីប្លុកមន្ទីរសាធារណៈការ និងដឹកជញ្ជូនក្នុងសង្កាត់ផ្ទះព្រៃ ក្រុងពោធិ៍សាត់ បានលើកគ្នាមកតវ៉ា នៅមុខសាលាខេត្តនាព្រឹកថ្ងៃទី២៣ សីហា ២០១២ នេះ ដើម្បីសុំឱ្យលោកអភិបាលខេត្តជួយចេញប្លង់កម្មសិទ្ធិស្របច្បាប់ឱ្យពួកគាត់ផង ។
ក្រុមអ្នកតវ៉ាបានលើកបដា និងរូបថតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី និងពាក់អាវគណបក្សប្រជាជនកម្ពុជាស្ទើរតែគ្រប់គ្នាដែលសបញ្ជាក់ថា ពួកគាត់ស្រលាញ់ និងបោះឆ្នោតជូនគណបក្សប្រជាជនកម្ពុជាជារៀងរហូតមក ។ ប្រជាពលរដ្ឋទាំងអស់មិនត្រូវបានគេបើកទ្វារឱ្យចូលក្នុងសាលាខេត្តទេ គឺអនុញ្ញាតិឱ្យតំណាងតែ៥នាក់ប៉ុណ្ណោះចូលជួប ។
ប្រជាពលរដ្ឋដែលនៅកកកុញលើសួនច្បារខាងមុខសាលាខេត្តបានរៀបរាប់ថា ពួកគាត់រស់នៅលើដីខាងលើនេះខ្លះតាំងពីឆ្នាំ១៩៧៩ ខ្លះឆ្នាំ១៩៨០ ដល់ឆ្នាំ១៩៨៦ ដែលមកដល់ពេលនេះជិត៣០ឆ្នាំមកហើយ ។ ជាក់ស្តែងដូចដីអតីតផ្លូវយន្តហោះជាដើម ឥឡូវនេះលែងជាផ្លូវយន្តហោះទៀតហើយ ព្រោះមានស្ថានីយ៍វិទ្យុ និងទូរទស្សន៍ ពន្ធនាគារ មន្ទីរធនធានទឹក និងឧតុនិយម មន្ទីរអភិវឌ្ឍន៍ជនបទ និងលំនៅដ្ឋានប្រជាពលរដ្ឋជាសំណង់រឹងមាំអស់ទៅហើយ ។ ម្យ៉ាងវិញទៀតផ្ទះដែលរស់នៅនោះមានទាំងពាក្យកាន់កាប់ សៀវភៅគ្រួសារ លេខផ្ទះត្រឹមត្រូវ រស់នៅយ៉ាងមានរបៀបរៀបរយ មិនមែនជាសំណង់អនាធិបតេយ្យនោះទេ ។ ពួកគេនិយាយយ៉ាងត្រឹមត្រូវថា ដីត្រឹមផ្លូវបែកជា៥ទៅជើង ជួរផ្ទះលោក ញឹក សារ៉េត ប្រធានមន្ទីរសង្គមកិច្ចអតីតយុទ្ធជន និងយុវនិតិសម្បទាដែលស្ថិតនៅលើដីអតីតផ្លូវយន្តហោះដែរនោះ គេវាស់ធ្វើប្លង់ឱ្យ ។ ចំណែកប៉ែកខាងត្បូង និងខាងលិចប្លុកពន្ធនាគារគេមិនវាស់ឱ្យទេ ហើយនៅពេលពួកគាត់ទៅជួបប្រធានមន្ទីរដែនដីនគរូបនីយកម្មសំណង់ និងសុរិយោដី និងតំណាងអភិបាលខេត្ត គេថាដីទាំងនោះគេមិនធ្វើប្លង់កម្មសិទ្ធជូនទេ ព្រោះជាដីស្ថិតក្នុងអាំងវ៉ង់ទែរបស់រដ្ឋ បើនៅបានចេះតែនៅសិនទៅ ។ ដោយសារភាពអយុត្តិធម៌ និងការរស់នៅមិនពេញលេញជាប្រជាពលរដ្ឋដូចគេនេះហើយ ទើបធ្វើឱ្យពួកគាត់មិនអាចនៅស្ងៀមបាន ក៏នាំគ្នាមកតវ៉ានៅខាងមុខសាលាខេត្តនាថ្ងៃនេះដើម្បីសុំឱ្យអភិបាលខេត្តចេញប្លង់កម្មសិទ្ធិស្របច្បាប់ដូចគ្នាឱ្យមានសិទ្ធិស្នើគ្នាផង ។
តំណាងទាំង៥នាក់មិនបានជួបផ្ទាល់ជាមួយលោក ខូយ សុខា អភិបាលខេត្តទេគឺជួបត្រឹមលោក អោក មុនី អភិបាលរងខេត្ត និងលោក ខូយ រីដា នាយករដ្ឋបាលសាលាខេត្តប៉ុណ្ណោះ ។
លោក អោក មុនី និងលោក ខូយ រីដា បាននិយាយថា ដីក្នុងក្រុងពោធិ៍សាត់ពិសេសម្តុំអតីតផ្លូវយន្តហោះនេះខេត្តកំពុងធ្វើសំណើរទៅថ្នាក់លើដើម្បីកាត់ចេញពីអាំងវ៉ង់ទែរបស់រដ្ឋប្រគល់ជូនប្រជាពលរដ្ឋដោយស្របច្បាប់ដែរ ហើយថ្នាក់លើក៏កំពុងតែពិនិត្យឯកសារ និងពិចារណាអំពីបញ្ហានេះ ។ លោកមានប្រសាសន៍ថា អនុសាសន៍របស់សម្តេចបានបញ្ជាក់ថា ប្រជាពលរដ្ឋខ្មែរត្រូវតែមានដីរស់នៅដោយស្របច្បាប់ ដូច្នេះសូមបងប្អូនកុំព្រួយបារម្ភអី ពេលព័ត៌មាននេះដឹងដល់សម្តេច សម្តេចនឹងអារកាត់ភ្លាមៗជាមិនខាន ហើយសូមបងប្អូននៅឱ្យស្ងៀមរង់ចាំខេត្តដោះស្រាយពិភាក្សាជាមួយថ្នាក់លើសិន ។
នៅពេលទទួលបានការបកស្រាយតាមរយៈតំណាងទាំង៥ភ្លាម នៅវេលាម៉ោង១០ព្រឹក បងប្អូនប្រជាពលរដ្ឋបានវិលត្រឡប់ទៅផ្ទះវិញធម្មតា ។ ពួកគាត់សូមឱ្យលោក ខូយ សុខា អភិបាលខេត្ត លោករដ្ឋមន្ត្រី ស៊ុយ សែម ប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ និងលោក លោកស្រីតំណាងរាស្ត្រ មេត្តាជួយពួកគាត់ផងដើម្បីទទួលបានប្លង់កម្មសិទ្ធស្របច្បាប់ រស់នៅជាប្រជាពលរដ្ឋពេញសិទ្ធិនឹងគេ ។ ទន្ទឹមនឹងនេះពួកគាត់មានជំនឿថា បើសិនជាសម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ដឹងពីទុក្ខកង្វល់របស់ប្រជាពលរដ្ឋក្នុងខេត្តពោធិ៍សាត់នេះ សម្តេចនិងលោកជំទាវប្រហែលជាមិនបណ្តោយឱ្យប្រជាពលរដ្ឋរស់នៅទាំងទឹកភ្នែកបែបនេះទេ ព្រោះថា«ទុក្ខកង្វល់របស់ប្រជាពលរដ្ឋគឺជាទុក្ខកង្វល់របស់រាជរដ្ឋាភិបាល» ៕
ចែករំលែកព័តមាននេះ