ក្នុងខណៈដែលព្រឹត្តិការណ៍ប្រកួតវាយកូនបាល់ក្របខណ្ឌធំបញ្ចប់រដូវកាល U.S Openនឹងឈានចូលមកដល់នៅថ្ងៃចន្ទសប្តាហ៍ក្រោយនេះ អ្នករៀបចំការប្រកួតកាលពីថ្ងៃពុធទី២២សីហាបានធ្វើការផ្តល់ចំណាត់ថ្នាក់ដល់កីឡាករ/កីឡាការិនីដែលនឹងមកចូលរួមដោយក្នុងនោះ វាយឯកត្តជនផ្នែកនារី កីឡាការិនីជាតិបេឡារុសវិចតូរីយ៉ា អាហ្សារិនកាត្រូវគេផ្តល់ចំណាត់ថ្នាក់លេខ១ ។ សូមបញ្ជាក់ថា អាហ្សារិនកាគឺជាកីឡាការិនីលំដាប់ទី១ពិភពលោក និងថ្មីៗនេះ នាងទើបតែឈ្នះមេដាយសំរឹទ្ធិកីឡាអូឡាំពិកទីក្រុងឡុងឆ្នាំ ២០១២ ។
ចំណែកនាងអានីយ៉េស្កា រែដវ៉ាន់ស្កាដែលគ្រងតំណែងជាកីឡាការិនីលំដាប់ទី២ពិភពលោកស្រាប់ហើយនោះទទួលបានចំណាត់ថ្នាក់លេខ២ ។
កីឡាការិនីរូបស្រស់របស់រុស្ស៊ីម៉ារីយ៉ា សារ៉ាប៉ូវ៉ា ម្ចាស់ពាន French Openនិងជាម្ចាស់មេដាយប្រាក់អូឡាំពិកក្រុងឡុងឆ្នាំ២០១២ជាប់លេខ៣ខណៈនាងស៊េរីណា វីលៀមម្ចាស់ជើងឯក U.S Open ៣ជំនាន់ជាប់លេខ៤ ។ កីឡាការិនីអាមេរិករូបនេះកាលពីខែកក្កដាកន្លងទៅបានយកឈ្នះពានក្របខណ្ឌធំ Wimbledon ហើយថ្មីៗនេះ ក្នុងព្រឹត្តិការណ៍កីឡាអូឡាំពិករដូវក្តៅទីក្រុងឡុងប្រទេសអង់គ្លេស នាងបានយកឈ្នះមេដាយមាសឯកត្តជនផ្នែកនារី ។ ឯនាងសាម៉ាន់ថា ស្តូសួដែលជាកីឡាការិនីការពារជើងឯកត្រូវគេផ្តល់ឱ្យចំណាត់ថ្នាក់លេខ៧ ។
លើការប្រកួតឯកត្តជនផ្នែកបុរសវិញ លេខ១បានទៅលើកីឡាករស្វុីសរ៉ូជើ ហ្វេដឺរ័រ ។ សូមបញ្ជាក់ថា ហ្វេដឺរ័រគឺជាកីឡាករលំដាប់ទី១ពិភពលោកនិងធ្លាប់បានយកឈ្នះពានU.S Openនេះចំនួន៥លើករួចមកហើយ ។ ការយកឈ្នះពានក្របខណ្ឌធំ Wimbledonកាលពីខែកក្កដាកន្លងមកនេះ នាំឱ្យរូបគេកាន់តែមានឈ្មោះល្បីនិងប្រជាប្រិយភាពឡើងវិញ ។ ក្នុងឆ្នាំ២០១២នេះ គេបានយកឈ្នះពានជើងឯកចំនួន៦លើកហើយ ។
ណូវ៉ាក់ យ៉ូកូវិចដែលជាកីឡាករការពារជើងឯកទទួលបានចំណាត់ថ្នាក់លេខ២ខណៈកីឡាករលំដាប់ទី៤ពិភពលោកអ៊ែនឌី មូរ៉េទទួលបានលេខ៣ ។ ដោយអវត្តមានកីឡាករជើងខ្លាំងរបស់អេស្ប៉ាញរ៉ាហ្វាអែល ណាដាល់ មូរ៉េក្នុងនាមជាម្ចាស់មេដាយមាសអូឡាំពិកក្រុងឡុងឆ្នាំ ២០១២មានសង្ឃឹមយ៉ាងមុតមាំក្នុងការឈានចូលដល់វគ្គផ្តាច់ព្រ័ត្រនិងដណ្តើមបានជ័យជម្នះ ៕
ចែករំលែកព័តមាននេះ