រាជធានីភ្នំពេញ ៖ ការស្ថាបនាកំណាត់ផ្លូវជាតិលេខ៦ ក្នុងភូមិសាស្ត្ររាជធានីភ្នំពេញ ឈានដល់ដំណាក់ចុងក្រោយ ពេលនេះចាប់ដំណើរការស្ថាបនាសួនច្បារចំកណ្តាលចែកទ្រូងផ្លូវ និងប្រព័ន្ធលូជាការបញ្ចប់ ។
លោកនង គន្ធរ៉ា ប្រធានអង្គភាពសាធារណការនៃមន្ទីរសាធារណការ និងដឹកជញ្ជូនរាជធានីភ្នំពេញ បានអំពាវនាវ និងសំណូមពរដល់បងប្អូនប្រជាពលរដ្ឋអ្នកធ្វើដំណើរ សូមប្រយ័ត្នប្រយែងពេលបើកបរនៅពេលដែលកំណាត់ផ្លូវជាតិលេខ6A ត្រូវបានសាងសង់សួនច្បារចំកណ្តាលចែកទ្រូងផ្លូវទៅនឹងមកដាច់ពីគ្នា ។
លោកនង គន្ធរ៉ា ឱ្យដឹងថា សួនច្បារបែងចែកទ្រូងផ្លូវដែលកំពុងស្ថាបនានាពេលនេះមានប្រវែង២ម៉ែត្រកន្លះនៅចន្លោះផ្លូវប្រវែង៤.០០០ម៉ែត្រ ចាប់ពីគល់ស្ពានមិត្តភាពកម្ពុជា-ជប៉ុន ដល់អគារមន្ទីរសុខាភិបាលថ្មីក្នុងសង្កាត់ព្រែកលៀប ខណ្ឌឫស្សីកែវ ដោយចាក់ដីទន្លេ, រៀបខឿន, ដាំស្មៅ, ដាំដើមជ្រៃ, ដាក់បង្គោលភ្លើងព្រែក១០០ដើម ដោយយកលំនាំតាមមុខទីស្តីការគណៈរដ្ឋមន្ត្រី ។ ជាមួយគ្នានេះ បងប្អូនដែលធ្វើដំណើរទៅទទួលទានអាហារ និងផឹកស៊ីនៅត្រើយម្ខាងក្នុងសង្កាត់ជ្រោយចង្វា និងព្រែកលៀបត្រូវមានការប្រុងប្រយ័ត្នខ្ពស់លើបញ្ហាសុវត្ថិភាពចរាចរណ៍ ជាពិសេសអ្នកស្រវឹងពេលយប់ ។
ដោយឡែកប្រព័ន្ធលូខ្នាតធំដែលមានមុខកាត់១ម៉ែត្រ ក៏កំពុងដំណើរការស្ថាបនាអមសងខាងផ្លូវប្រវែង៨.០០០ម៉ែត្រដែលពេលនេះបានរួចរាល់៣៥% ហើយ ។ សូមបញ្ជាក់ថា កំណាត់ផ្លូវជាតិលេខ៦ ស្ថិតក្នុងភូមិសាស្ត្ររាជធានីភ្នំពេញ ប្រវែង៤.០០០ម៉ែត្រ ទទឹង២៣ម៉ែត្រកន្លះ ត្រូវបានអ៊ុតកៅស៊ូរួចរាល់កាលពីខែមេសា ឆ្នាំ២០១២។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ