រាជធានីភ្នំពេញ ៖ ស្ត្រីម្នាក់ដោយសារផឹកស្រាស្រវឹងរាល់ថ្ងៃបានក្លាយជាមនុស្សមានជំងឺសរសៃប្រសាទ ហើយបានទាញកាំបិតបុ័ងតោមកអារ.កធ្វើអត្តឃាតសម្លាប់ខ្លួនឯង បណ្តាលឱ្យស្លាប់បាត់បង់ជីវិតភ្លាមៗនៅនឹងកន្លែង ចោលប្តី និងកូនប្រុស២នាក់ឱ្យរស់នៅកំព្រាឯកោ និងបង្កឱ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង៤និង២០នាទីទៀបភ្លឺថ្ងៃទី២៣ សីហា ២០១២ នៅក្នុងភូមិចំការឪឡឹក សង្កាត់កាកាប ខណ្ឌពោធិ៍សែនជ័យ ។
ស្ត្រីរូបនោះឈ្មោះម៉ម សុខ អាយុ៣០ឆ្នាំ មុខរបរដើរលក់បន្លែបន្តិចបន្តួច មានប្តីឈ្មោះជួប ម៉ៅ អាយុ៤៥ឆ្នាំ មុខរបរកម្មករសំណង់ មានកូនប្រុស២នាក់ សព្វថ្ងៃមានទីលំនៅភូមិកើតហេតុខាងលើ ហើយស្ត្រីរូបនោះបានផឹកស្រាស្រវឹងរាល់ថ្ងៃរហូតក្លាយទៅជាមនុស្សមានជំងឺសរសៃប្រសាទ និងសម្លាប់ខ្លួនឯងបែបនេះតែម្តង ។
បុរសជាប្តីបានឱ្យដឹងថា គាត់ និងប្រពន្ធបានរៀបការជាមួយគ្នារយៈពេលជាង១០ឆ្នាំមកហើយ ដោយទទួលបានចំណងដៃកូនប្រុស២នាក់ ហើយការរស់នៅមិនដែលមានទំនាស់នឹងគ្នានោះទេ គាត់ធ្វើជាកម្មករសំណង់ ឯប្រពន្ធដើរបេះស្លឹកបះ ឬត្រកួនទូលដើរលក់បានប្រាក់បន្តិចបន្តួចគ្រាន់ចិញ្ចឹមជីវិត។ ប្រភពបន្តថា កាលពីមុនប្រពន្ធគាត់មិនចេះផឹកស្រានោះទេ ទើបតែប៉ុន្មានឆ្នាំចុងក្រោយនេះ នាងបានផឹកស្រវឹងរាល់ថ្ងៃ ក៏ក្លាយទៅជាមនុស្សមានជំងឺសរសៃប្រសាទ និយាយស្តីមិនសូវដឹងខុសត្រូវជួនកាលច្រៀងលេងតែម្នាក់ឯងទៀតផង ។ លុះមកដល់ថ្ងៃកើតហេតុខាងលើស្រាប់តែអារ.កសម្លាប់ខ្លួនឯងតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ