កីឡាករអាល្លឺម៉ង់ John Degenkolbទទួលបានក្តីរីករាយជាថ្មីម្តងទៀតបន្ទាប់ពីបានយកឈ្នះណាក់ទី៥នៃការប្រណាំងកង់កម្មវិធី Tour of Spainនៅប្រទេសអេស្ប៉ាញកាលពីថ្ងៃពុធទី២២ខែសីហាកន្លងមកនេះ។ ការប្រណាំងក្នុងដំណាក់នេះត្រូវបានបញ្ចប់នៅទីក្រុង Logroño។
Degenkolbដែលជាអ្នកជិះកង់ឱ្យក្រុមArgos-Shimanoបានយកឈ្នះដំណាក់ដែលមានចម្ងាយផ្លូវ១៦៨គីឡូម៉ែត្រដោយបណ្តាកីឡាករត្រូវជិះ៨ជុំជុំវិញទីក្រុង Logroñoស្ថិតនៅភាគខាងជើងប្រទេសអេស្ប៉ាញ ។ Degenkolbបានប្រើអស់ថិរវេលាតិចជាងគេបំផុតគឺ៤ម៉ោង១០នាទីនិង៣៧វិនាទីយកឈ្នះកីឡាករអុីតាលី Daniele Bennatiជិះឱ្យក្រុម Radioshack-Nissanនិងបានយកឈ្នះកីឡាករបែលហ្ស៊ិក Gianni Meersmanជិះឱ្យក្រុម Lotto Belisol Teamដែលទាំង២នាក់ប្រើថិរវេលាស្មើៗគ្នា។
សម្រាប់ Degenkolb នេះគឺជាជ័យជម្នះក្នុងដំណាក់លើកទី២ហើយខណៈជ័យជម្នះលើកទី១របស់គេគឺនៅក្នុងដំណាក់ទី២ ។ គេបានថ្លែងក្នុងក្តីរីករាយថា៖«ខ្ញុំពិតជាសប្បាយចិត្តណាស់ដែលបានយកឈ្នះ១ដំណាក់ជាថ្មីទៀត។ នេះពិតជាជ័យជម្នះយ៉ាងពិសេសមួយដ្បិតការប្រណាំងនៅដំណាក់នេះប្រជុំទៅដោយកីឡាករជើងខ្លាំងជាច្រើន។ សង្ឃឹមថាជ័យជម្នះនៅដំណាក់ក្រោយៗគឺជារបស់ខ្ញុំទៀត។ ខ្ញុំនឹងប្រឹងប្រែងឱ្យអស់ពីលទ្ធភាពដើម្បីបន្តនិរន្តរ៍ភាពនៃជ័យជម្នះ»។
បើទោះជារូបគេបានយកឈ្នះការប្រណាំងក្នុងដំណាក់ជាលើកទី២ក្តី ក៏ប៉ុន្តែនៅលើតារាងពេលថិរវេលាសរុប រូបគេនៅតែពុំទាន់អាចដណ្តើមបានការនាំមុខជាដដែល ដ្បិតកីឡាករអេស្ប៉ាញ Joaquim Rodriguezដែលបានបញ្ចប់ដំណាក់នេះក្នុងលំដាប់ទី៥០នោះ សន្សំពេលវេលាបានយ៉ាងល្អបំផុតគ្រងអាវកាក់ពណ៌ក្រហមក្នុងនាមជាអ្នកនាំមុខគេសម្រាប់ការប្រណាំងទាំងមូល ។
ឆ្លងកាត់ការប្រណាំងចំនួន៥ដំណាក់មកនេះ Joaquim Rodriguezដែលជិះឱ្យក្រុម Katusha Teamបានប្រើអស់ថិរវេលាតិចជាងគេបំផុតគឺ១៧ម៉ោងនិង២៩នាទីនិង២២វិនាទីនាំមុខកីឡាករអង់គ្លេស Christopher Froomeដែលប្រើថិរវេលាច្រើនជាង១វិនាទី។ ចំណែកកីឡាករអេស្ប៉ាញម្នាក់ទៀតអាល់បឺតូ កុងតាឌ័រស្ថិតនៅលំដាប់ទី៣បន្ទាប់ពីបានប្រើថិរវេលាច្រើនជាងកីឡាករ Rodriguez ៥វិនាទី ។
សូមបញ្ជាក់ថាការប្រណាំងកម្មវិធី Tour of Spainឆ្នាំនេះចែកចេញជា២១ដំណាក់និងមានចម្ងាយផ្លូវសរុប៣៣៦០គីឡូម៉ែត្រ។ ដោយឡែកដំណាក់ទី៦ដែលជាដំណាក់បន្តមានចម្ងាយផ្លូវ១៧៥.៤គីឡូម៉ែត្រដោយការប្រណាំងចាប់ចេញដំណើរពីទីក្រុង Tarazona ឆ្ពោះទៅកាន់ទីក្រុង Jaca ភាគឦសាននៃប្រទេសអេស្ប៉ាញ ៕
ចែករំលែកព័តមាននេះ