រាជធានីភ្នំពេញ ៖ ដើម្បីពង្រឹងសន្តិសុខ និងលុបបំបាត់ល្បែងស៊ីសងនៅក្នុងមូលដ្ឋានខណ្ឌទួលគោក ក៏ដូចជារាជធានីភ្នំពេញ ឱ្យកាន់តែល្អប្រសើរ និងបិទទាំងស្រុង គណៈបញ្ជាការឯកភាពខណ្ឌទួលគោក កាលពីព្រឹកថ្ងៃទី២២ សីហា ២០១២ បានជួបប្រជុំមន្ត្រីរាជការ ដើម្បីដាក់ផែនការដល់សង្កាត់ទាំង១០ឱ្យចាត់វិធានការ និងទទួលខុសត្រូវលើមូលដ្ឋានរបស់ខ្លួន ។
លោកសេង រតនៈ ប្រធានគណៈបញ្ជាការឯកភាពខណ្ឌទួលគោក បានឱ្យដឹងថា បញ្ហាសន្តិសុខជាបញ្ហាមួយដែលត្រូវយកចិត្តទុកដាក់បំផុតដែលកន្លងមក សាលារាជធានីភ្នំពេញ បានណែនាំដល់គណៈបញ្ជាការឯកភាពខណ្ឌជំរុញការគ្រប់គ្រងបុរី ខុនដូ ដែលនៅមានចន្លោះប្រហោង ។ ដូចនេះ សូមអភិបាលរងទទួលបន្ទុកសង្កាត់ប៉ុស្តិ៍ការិយាល័យទេសចរណ៍ ប្រធានភូមិត្រូវចុះត្រួតពិនិត្យ និងរាយការណ៍ថា បុរីនោះវាពិតជាបុរី ឬមិនមែនជាបុរីគ្រប់គ្រងឱ្យបានច្បាស់ ។ ត្រូវមានកិច្ចទំនាក់ទំនងគ្នារវាងបុរី និងអាជ្ញាធរធ្វើយ៉ាងណាគ្រប់គ្រងទាំងមនុស្ស និងកិច្ចការការពារសន្តិសុខជូនប្រជាពលរដ្ឋឱ្យកាន់តែប្រសើរឡើង ។
លោកអភិបាលខណ្ឌបានណែនាំដល់អាជ្ញាធរក៏ដូចជាកម្លាំងសមត្ថកិច្ចកុំឱ្យយកលុយពីវង់ល្បែង យើងក្រក្រចុះត្រូវគោរពបទបញ្ជាស្នងការ មេបញ្ជាការគណៈបញ្ជាការឯកភាពខណ្ឌ និងរាជរដ្ឋាភិបាល ។ សង្កាត់ណាមានល្បែងស៊ីសងចៅសង្កាត់មេប៉ុស្តិ៍ទទួលខុសត្រូវ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ