ខេត្តព្រៃវែង ៖ ពិធីផ្លាស់ប្តូរអភិបាលខេត្តព្រៃវែងនត្រូវបានរៀបចំឡើងនាព្រឹកថ្ងៃទី២៣ សីហា ២០១២ នៅសាលាខេត្តព្រៃវែង ដោយលោកហាស់ សារ៉េត អភិបាលខេត្តកែប ផ្លាស់ទៅកាន់តំណែងជាអភិបាលខេត្តព្រៃវែងជំនួសលោកអ៊ុង សាមី ដែលនឹងត្រូវឡើងទៅកាន់តំណែងជាអនុរដ្ឋលេខាធិការក្រសួងមហាផ្ទៃក្រោមអធិបតីភាពលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហផ្ទៃ ។
ចំណែកការផ្លាស់ប្តូរមួយទៀត គឺលោកផាន់ ចាន់ថុល អភិបាលរងខេត្តព្រៃវែង និងជាប្រធានសាខាកាកបាទក្រហមខេត្តផងនោះ ត្រូវបានដកចេញពីមុខតំណែង ហើយអ្នកដែលឡើងមកកាន់តំណែងជំនួសលោកអភិបាលរងរូបនេះ គឺលោកអ៊ុំ ប៊ុនឡេង នាយខុទ្ទកាល័យនៃសាលាខេត្តព្រៃវែង។ តាមប្រភពព័ត៌មានបង្ហើបឱ្យដឹងថា ការដកមុខតំណែងលោកផាន់ ចាន់ថុលនេះ អាចបណ្តាលមកពីមានកំហុសឆ្គងក្នុងការអនុវត្តការងារកន្លងមក ដូចជាលោកអភិបាលរងរូបនេះ មិនសូវធ្វើកិច្ចការសាលាខេត្ត និងចុះមូលដ្ឋាន … ប៉ុន្តែលោកបែរជាធ្វើកិច្ចការផ្ទាល់ខ្លួនបែបឯកជនច្រើនជាងការងាររដ្ឋ ។
គួររំលឹកថា ពិធីផ្លាស់ប្តូរតំណែងអភិបាលខេត្តកែបជាផ្លូវការ បានប្រព្រឹត្តឡើងនៅព្រឹកពុធទី២២ សីហា ២០១២ ដោយលោកកែន សត្ថា អភិបាលរងខេត្តនេះ បានឡើងទៅកាន់មុខតំណែងជាអភិបាលខេត្តកែប ជំនួសលោកហាស់ សារ៉េត ដែលត្រូវបានផ្លាស់ទៅធ្វើជាអភិបាលខេត្តព្រៃវែងជំនួសលោកអ៊ុង សាមី ដែលនឹងឡើងកាន់តួនាទីជាអនុរដ្ឋលេខាធិការក្រសួងមហាផ្ទៃ ។
នេះបើយោងតាមអ្នកនំាពាក្យក្រសួងមហាផ្ទៃលោកឧត្តមសេនីយ៍ឯកខៀវ សុភ័គ ដែលថ្លែងតាមទូរស័ព្ទប្រាប់កោះសន្តិភាពនៅរសៀលថ្ងៃទី២០ សីហា២០១២ កន្លងមកនេះ ។ លោកខៀវ សុភ័គ បានបញ្ជាក់ឲ្យដឹងដែរថា ការផ្លាស់ប្តូរនេះ មិនមែនជាការដកតួនាទីអ្វីនោះទេ គឺជាការកែសម្រួលភារកិច្ចតែប៉ុណ្ណោះ ដោយសារលោកអ៊ុង សាមី មានបញ្ហាសុខភាព ដែលធ្វើឲ្យកិច្ចការរបស់លោកមួយចំនួនមិនអាចឆ្លើយតបទៅនឹងតួនាទី និងតម្រូវការរបស់ក្រសួងមហាផ្ទៃ ។ បើតាមអ្នកនំាពាក្យក្រសួងមហាផ្ទៃបានឲ្យដឹងទៀតថា ពិធីផ្ទេរមុខតំណែងខេត្តព្រៃវែងនឹងប្រារព្ធធ្វើនៅថ្ងៃព្រហស្បតិ៍ទី២៣ សីហា ២០១២ ខាងមុខនេះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ