ខេត្តកណ្តាល ៖ យ៉ាងហោចណាស់កម្មករ៦នាក់រងរបួសធ្ងន់ និង៩នាក់ផ្សេងទៀតរបួសស្រាល ត្រូវបាននាំទៅសង្គ្រោះនៅមន្ទីរពេទ្យភ្លាមៗ បន្ទាប់ពីមានការបាក់អគាររោងចក្រដែលសាងសង់ពីគ្រោងដែកក្នុងសួនឧស្សាហកម្មយៀនឈីង ដែលមានទីតាំងស្ថិតនៅក្នុងភូមិអំពិលរូង ឃុំទំនប់ធំ ស្រុកពញាឮ ខេត្តកណ្តាល ។ ឧប្បទ្ទវហេតុគ្រោះថ្នាក់បាក់អគារនេះ បានកើតឡើងនៅវេលាម៉ោង៧ និង២០នាទីថ្ងៃទី២២ សីហា ។
តាមរបាយការណ៍របស់ប៉ូលិសប៉ុស្តិ៍រដ្ឋបាលទំនប់ធំ បានឱ្យដឹងថា មុនពេលកើតហេតុ គឺក្រុមកម្មករ៩នាក់កំពុងតែធ្វើការតាមតួនាទីរៀងខ្លួន និងអ្នកខ្លះជាជាងដែកបានឡើងទៅផ្សារផ្នែកដំបូលដូចធម្មតា ក៏ស្រាប់តែបាក់ធ្លាក់មកតែម្តង ។ លោកថ្លាង ភិនរ៉ា អធិការប៉ូលិសស្រុកមានប្រសាសន៍ថា កម្មករប្រមាណ២០នាក់កំពុងធ្វើការដោយអ្នកខ្លះនៅពីក្រោម អ្នកខ្លះទៀតនៅផ្សារដំបូលអគារដែលប្រក់ដោយស័ង្កសី ។ ពេលកំពុងធ្វើការនោះក៏មានសំឡេងឱ្យដឹងផងដែរ មុនពេលបាក់ តែការឱ្យសំឡេងនោះមិនទាន់ទាំងបានប៉ុន្មានផងដំបូលអគារក៏បាក់ធ្លាក់ដាបមកក្រោមស្ទើរតែទាំងស្រុង ។
តាមការសន្ឋិដ្ឋានគ្រាដំបូងមិនទាន់ជាផ្លូវការនៅឡើយនោះ គឺការបាក់អគាររោងចក្រនេះ អាចបណ្តាលមកពីគ្រឿងចក្រដែលកាយដីក្បែរអគារធ្វើឱ្យមានរំញ័រ ទើបបង្កឱ្យគ្រោងអគារដែលគ្មានសសរកណ្តាលនោះក៏កាច់បាក់សសរជើងរៀងផ្នែកខាងក្រោមទើបធ្វើឱ្យបាក់ធ្លាក់ដំបូលអគារមកក្រោមតែម្តង ។ អគាររោងចក្រដែលកំពុងសាងសង់នេះមានបណ្តោយប្រវែង១២០ម៉ែត្រ និងទទឺង៧០ម៉ែត្រ កម្ពស់៩ម៉ែត្រ និងទើបតែសង់បាន៥០ភាគរយតែប៉ុណ្ណោះ ។ ទោះបីជាមានការសន្និដ្ឋានដូចខាងលើនេះក្តី ក៏មិនទាន់ត្រូវបានចាត់ទុកជាផ្លូវការនៅឡើយទេ ប៉ុន្តែតាមស្ថានភាពនៃការសាងសង់អគារដែលគ្មានសសរកណ្តាលនេះអាចមានបញ្ហាបច្ចេកទេស ដែលបណ្តាលឱ្យសសរជើងរៀងមិនអាចទ្រទម្ងន់ដំបូលបានទើបបង្កឱ្យមានការបាក់ធ្លាក់បែបនេះ ។
កាលពីប៉ុន្មានខែមុននេះ អគាររោងចក្រមួយកន្លែងនៅក្នុងសង្កាត់ភ្នំពេញថ្មី ខណ្ឌសែនសុខ ក្នុងរាជធានីភ្នំពេញ ក៏បានបាក់រាបដល់ដីដែរ ដោយសារតែខ្យល់ហើយក៏ចាត់ទុកជាសំណាងល្អដែរ ដែលក្នុងអគារនោះមិនទាន់មានកម្មករធ្វើការនៅឡើយទេ ។ ការបាក់នោះបានបង្ហាញឱ្យឃើញថា ការសាងសង់អគារដោយគ្រោងដែកនោះមិនមានភាពរឹងមាំនេះទេ ប្រសិនបើការសាងសង់មានបច្ចេកទេសស្ទើរភ្លើង ៕
ចែករំលែកព័តមាននេះ