ខេត្តកំពត ៖ យោងតាមសេចក្តីរាយការណ៍បានឱ្យដឹងថា លោកចាន់ វិទូ ថៅកែកាស៊ីណូសាន់ដេ ត្រូវបានឃាត់ខ្លួនពីបទបង្កការផ្ទុះអាវុធអនាធិបតេយ្យជាច្រើនគ្រាប់ កាលពីវេលាម៉ោង៤និង២៥នាទីរសៀលថ្ងៃទី២១ សីហា នៅកន្លែងផឹកសីុមួយក្បែរបង្គោលព្រំដែនកម្ពុជា-វៀតណាម លេខ៣១៤ ស្ថិតក្នុងភូមិថ្កូវ ឃុំឫស្សីស្រុកលិច ស្រុកកំពង់ត្រាច ។
ប្រភពព័ត៌មានបន្តថា មុនពេលផ្ទុះអាវុធនៅវេលាម៉ោង៣រសៀលថ្ងៃទី២១ សីហា លោកចាន់ វិទូ បាននាំកូនចៅធ្វើការក្នុងកាស៊ីណូរបស់ខ្លួនប្រហែលជា៥០នាក់ ធ្វើដំណើរដោយជិះទូកបីគ្រឿងតាមដងព្រែកចាក ទៅផឹកស៊ីនៅហាងមួយក្បែរបង្គោលព្រំដែន ។
ក្រោយពីផឹកស៊ីអស់រយៈពេលជាងមួយម៉ោង គឺនៅវេលាម៉ោង៤និង២៥នាទីរសៀលថ្ងៃដដែលនោះ ក៏មានឮស្នូរផ្ទុះអាវុធខ្លីប្រមាណ១០គ្រាប់ ។ ក្រោយពីមានការផ្ទុះអាវុធសមត្ថកិច្ចការពារព្រំដែន ក៏បាននាំ កម្លាំងចម្រុះមាននគរបាលប៉ុស្តិ៍ យោធាព្រំដែន និងកងរាជអាវុធហត្ថចុះទៅដល់កន្លែងកើតហេតុ ដើម្បីត្រួតពិនិត្យហេតុការណ៍ក្រែងមានអំពើប្លន់ប្រដាប់អាវុធណាមួយកើតឡើង ។ ពេលសមត្ថកិច្ចទៅដល់ ឃើញថៅកែកាស៊ីណូសាន់ដេ ឈ្មោះចាន់ វិទូ កំពុងចូលរួមផឹកស៊ីនៅក្នុងហាងនោះជាមួយកូនចៅរបស់ខ្លួនជាង៥០នាក់ ក៏បានហៅថៅកែនោះមកសួរនាំពីករណីផ្ទុះអាវុធ ប៉ុន្តែលោកចាន់ វិទូ បានប្រាប់សមត្ថកិច្ចថា ខ្លួនពុំបានដឹងទេ ។
ក្រោយមកសមត្ថកិច្ចក៏បានឆែកឆេរនៅក្បែរហាងផឹកស៊ីនោះ ក៏បានរកឃើញអាវុធខ្លីមួយដើមម៉ាកឡុក និងសំបកគ្រាប់ចំនួនបួនគ្រាប់ដែលអ្នកបាញ់យកទៅលាក់ទុកក្នុងគំនរមងចាស់ៗដែលនៅជិតកន្លែងផឹកសីុប្រហែលជា២០ម៉ែត្រ ។ ពេលនោះសមត្ថកិច្ចក៏បានសួរនាំរកម្ចាស់អាវុធ ហើយលោកចាន់ វិទូ ក៏បានអះអាងប្រាប់សមត្ថកិច្ចថា ជាអាវុធរបស់ខ្លួន ។ ជុំវិញករណីបាញ់បោះនេះ លោកវិទូ បានអះអាងប្រាប់សមត្ថកិច្ចថា បញ្ហាផ្ទុះអាវុធនេះ គឺខ្លួនជាអ្នកទទួលខុសត្រូវ ។
ក្រោយពីកម្លាំងសមត្ថកិច្ចរកឃើញអាវុធ ព្រមទាំងមានការអះអាងទទួលខុសត្រូវពីម្ចាស់អាវុធផងនោះ កម្លាំងសមត្ថកិច្ចក៏បានរាយការណ៍មកការិយាល័យនគរបាលកណ្តាលយុត្តិធម៌នៃស្នងការដ្ឋាននគរបាលខេត្ត ។ ក្រោយមកលោកស្នងការខេត្តក៏បានបញ្ជាឱ្យកម្លាំងការិយាល័យព្រហ្មទណ្ឌចុះទៅនាំខ្លួនថៅកែកាសីុណូរូបនោះមកកាន់ស្នងការដ្ឋាននគរបាលខេត្តដើម្បីសាកសួរ ។ ការនាំខ្លួនថៅកែកាសីុណូ ដែលបាញ់បោះសេរីបង្កការភ្ញាក់ផ្អើលមកកាន់ស្នងការដ្ឋាននគរបាលខេត្ត ធ្វើឡើងនៅវេលាម៉ោង៩និង១៥នាទីយប់ថ្ងៃដដែល ដោយមានកូនចៅថៅកែរូបនេះ ៥នាក់ទៀតតាមមកជាមួយ មិនដឹងថាតាមមកក្នុងគោលបំណងអ្វីទេ ហើយក៏ត្រូវសមត្ថកិច្ចឃាត់ខ្លួនទាំង៥នាក់ ដើម្បីសួរនាំតែម្តង ។ ជុំវិញការនាំខ្លួនថៅកែកាស៊ីណូមកសួរនាំនៅស្នងការដ្ឋាននគរបាលខេត្តនេះ ពុំមានប្រភពណាមួយទម្លាយឱ្យដឹងពីមូលហេតុនៃការផ្ទុះអាវុធនោះទេ ៕
ចែករំលែកព័តមាននេះ