ខេត្តពោធិ៍សាត់ ៖ កាលពីថ្ងៃទី២០ សីហា ២០១២ ប្រជាពលរដ្ឋឃុំឈើតុំ ស្រុកក្រគរ ២នាក់បាននាំយកអាវុធចំនួន៣ដើម ប៉ុន្តែពុំមានគ្រាប់ទេ មកប្រគល់ឱ្យនគរបាលប៉ុស្តិ៍រដ្ឋបាលឈើតុំ ដែលពួកគាត់រើសបានពីក្នុងព្រៃកាលពីថ្ងៃទី១៨ សីហា ២០១២ កន្លងមក ។
លោកនាយប៉ុស្តិ៍ឱ្យដឹងថា អាវុធទាំង៣ដើមនេះធុន CKC ២ដើម ខូចគុណភាពមិនអាចប្រើប្រាស់កើតទេ ដែលប្រជាពលរដ្ឋឈ្មោះសែម ម៉ៅ ភេទប្រុស អាយុ៥០ឆ្នាំ រើសបាននៅចំណុចស្រែអំពិល ជាប់ព្រំប្រទល់ខេត្តកំពង់ឆ្នាំង ខណៈពេលទៅធ្វើស្រែនៅទីនោះ ។ ចំណែកមួយដើមទៀតធុន AK ស្វាយបត់អាចប្រើប្រាស់បាន៤០% ត្រូវបានប្រជាពលរដ្ឋឈ្មោះមាស សុខ ភេទប្រុស អាយុ៦៣ឆ្នាំ រើសបាននៅក្នុងព្រៃចំណុចអ្នកតាក្រហ មកជាប់ព្រំប្រទល់ស្រុកភ្នំក្រវាញ ខណៈពេលទៅរកអុស ។
លោកវរសេនីយ៍ត្រី ប៊ិន វណ្ណា អធិការនគរបាលស្រុកក្រគរ បានកោតសរសើរដល់ប្រជាពលរដ្ឋទាំងពីរនាក់ដែលមានស្មារតីភ្ញាក់រលឹកខ្ពស់រើសបានអាវុធយកមកប្រគល់ឱ្យសមត្ថកិច្ចរក្សាទុកជាគំរូមួយដ៏ល្អសម្រាប់ប្រជាពលរដ្ឋផ្សេងទៀត ព្រមទាំងបានរួមចំណែកយ៉ាងសកម្មក្នុងការប្រមូលអាវុធ និងគ្រាប់យុទ្ធភណ្ឌមិនទាន់ផ្ទុះ ។ លោកបានធ្វើការសន្និដ្ឋានថា អាវុធខាងលើនេះអាចសេសសល់កាលពីសម័យសង្គ្រាម ឬជារបស់ក្រុមចោរប្លន់លួចគោក្របី និងទ្រព្យសម្បត្តិប្រជាពលរដ្ឋដែលតែងតែធ្វើសកម្មភាពក្នុងស្រុកក្រគរនេះ ។ លោកអធិការបានអំពាវនាវដល់ប្រជាពលរដ្ឋដទៃទៀតដែលលាក់ទុកអាវុធខុសច្បាប់ ឬគ្រាប់យុទ្ធភណ្ឌមិនទាន់ផ្ទុះ រើសបានអាវុធគ្រប់ប្រភេទ សូមមេត្តាយកមកប្រគល់ឱ្យសមត្ថកិច្ចគ្រប់គ្រង ដើម្បីចៀសផុតពីការមានទោស ៕
ចែករំលែកព័តមាននេះ