រាជធានីភ្នំពេញ ៖ កម្លាំងកងរាជអាវុធហត្ថខណ្ឌសែនសុខ កាលពីថ្ងៃទី២០ សីហា ២០១២ វេលាម៉ោង៨ និង៣០នាទីយប់ បានឃាត់ខ្លួនជនសង្ស័យចំនួន២នាក់ ជាសិស្សសាលា និងថ្នាំញៀនប្រភេទម៉ាទឹកកកចំនួន១១កញ្ចប់តូចជាមួយនឹងម៉ូតូស្គូពី១គ្រឿង រួមទាំងដកហូតទូរស័ព្ទNokIa ចំនួន២គ្រឿង និងទូរស័ព្ទម៉ាក Gwin ១គ្រឿងថែមទៀតផង ។
លោកគិត សុផល មេបញ្ជាការកងរាជអាវុធហត្ថខណ្ឌសែនសុខបានប្រាប់កោះសន្តិភាពថា ជនសង្ស័យទាំង២ខាងលើ ត្រូវបានកម្លាំងកងរាជអាវុធហត្ថខណ្ឌសែនសុខចុះល្បាតតាមភូមិសាស្ត្រនៅចំណុចក្រុម១០ ផ្លូវបេតុង ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ ខណៈដែលជននេះជិះម៉ូតូ១គ្រឿង ក៏មានការសង្ស័យ ទើបចាប់ឃាត់ខ្លួនឆែកឆេរជនទាំង២នាក់ ដោយរកឃើញថ្នាំញៀនប្រភេទម៉ាទឹកកកចំនួន១១កញ្ចប់ ភ្លាមៗកងរាជអាវុធហត្ថ ក៏បញ្ជូនទៅទីបញ្ជាការសាកសួរ ។
លោកបន្តថា ជនសង្ស័យទាំង២នាក់នេះ មាន១-ឈ្មោះសេក មាស ភេទប្រុស អាយុ២៤ឆ្នាំ ជាសិស្សស្នាក់នៅផ្ទះលេខ១ ផ្លូវលេខ២៨២ ភូមិទួលគោក សង្កាត់បឹងកក់១ ខណ្ឌទួលគោក និង២-ឈ្មោះហ៊ុន ចាន់សុវណ្ណារិទ្ធ ភេទប្រុស អាយុ១៧ឆ្នាំ ជាសិស្ស ស្នាក់នៅផ្ទះគ្មានលេខ ផ្លូវបេតុង ភូមិត្នោតជ្រុំ សង្កាត់បឹងទំពុន ខណ្ឌមានជ័យ ។ បច្ចុប្បន្នជនសង្ស័យខាងលើ ត្រូវបានបញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ក្រោយពីកសាងសំណុំរឿងបញ្ចប់រួចហើយនោះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ