រាជធានីភ្នំពេញ ៖ បុរសម្នាក់កាលពីវេលាម៉ោងប្រមាណ៥និង១៥នាទីល្ងាចថ្ងៃទី២១ សីហា ត្រូវសមត្ថកិច្ចនគរបាលសង្កាត់បឹងព្រលឹត ឃាត់ខ្លួនជាមួយនឹងម៉ូតូ១គ្រឿង ខណៈជននេះកំពុងបណ្តើរដែលលួចបានពីមុខផ្ទះប្រជាពលរដ្ឋ ។
ជនសង្ស័យដែលត្រូវសមត្ថកិច្ចឃាត់ខ្លួនឈ្មោះកង សុបញ្ញា អាយុ២៥ឆ្នាំ ស្នាក់នៅផ្ទះលេខ១២៥ ភូមិព្រះពន្លា សង្កាត់ព្រែកប្រា ខណ្ឌមានជ័យ ។ ការឃាត់ខ្លួនបុរសរូបនេះបានត្រូវលោកអនុសេនីយ៍ទោ ប៉ាត សំណាត ប្រធាននគរបាលប៉ុស្តិ៍បឹងព្រលឹត ឱ្យដឹងថា ពេលឈ្មោះកង សុបញ្ញា យកម៉ូតូទៅបញ្ចាំបានប្រាក់ហើយក៏ឡើងម៉ូតូមិត្តភក្តិសំដៅទៅកាស៊ីណូ ដើម្បីលេងល្បែងស៊ីសង ។ ប្រាក់១.០៧០ដុល្លារ គេលេងបានប្រហែល២ម៉ោងក៏ចាញ់ម៉ដ្ឋទៅ នៅពេលអស់លុយបានចេញទៅអង្គុយសំកុកតាមសួនច្បារដោយមិនហ៊ានចូលផ្ទះទេ ខ្លាចឪពុកម្តាយសួររកម៉ូតូ ។
ការសញ្ជឹងគិតនៅតាមសួនច្បារ ពោរពេញទៅដោយក្រពះស្រេកឃ្លានវេលារសៀលគេបានដើរត្រាច់ចរគ្មានគោលដៅ លុះទៅដល់ក្បែរផ្សារអូរឫស្សីនៅមុខផ្ទះលក់ម៉ាញ៉េ និងទូរទស្សន៍ឃើញម៉ូតូស្គូពី១គ្រឿងដែលម្ចាស់មិនចាក់សោ.កក៏លួចអូសបណ្តើរទៅទិសខាងត្បូងតម្រង់រោងភាពយន្តគីរីរម្យបានបន្តិចក៏ជាប់អន្ទាក់ប៉ូលិសតែម្តង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ