ខេត្តប៉ៃលិន ៖ បុរសមេជាងដែកម្នាក់ទើបតែត្រូវបានគេជួលឱ្យឡើងផ្សារដែកដំបូលផ្ទះថ្ម២ជាន់របស់គេបានមួយព្រឹក ស្រាប់តែរអិលជើងធ្លាក់ពីលើដំបូលកម្ពស់៨ម៉ែត្រ បណ្តាលឱ្យរងរបួសប្រេះឆ្អឹងស្មងជើងទាំងសងខាងយ៉ាងធ្ងន់ធ្ងរ ចេញឈាមតាមមាត់ដេកសន្លប់នៅនឹងកន្លែងត្រូវបានបងប្អូន និងអ្នកជិតខាងដឹកតាមរថយន្តយកទៅមន្ទីរពេទ្យបង្អែកខេត្តដើម្បីសង្គ្រោះជីវិត លុះទៅដល់ទីនោះមួយសន្ទុះទើបដឹងខ្លួនឡើងវិញ ។
ជនរងគ្រោះឈ្មោះមាង លី ភេទប្រុស អាយុ២៨ឆ្នាំ ជាមេជាងផ្សារដែក រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។ ករណីធ្លាក់ពីលើដំបូលផ្ទះថ្ម២ជាន់នេះកើតឡើងកាលពីវេលាម៉ោង១១ព្រឹកថ្ងៃទី២១ សីហា ២០១២ នៅចំណុចភូមិតាង៉ែនលើ សង្កាត់ប៉ៃលិន ក្រុងប៉ៃលិន ។ គួររលឹកផងដែរថា កាលពីខែមេសា ២០១២ នេះ ជនរងគ្រោះត្រូវបានគេចាក់មួយដែកឆាបនៅខេត្តកំពង់ធំ ម្តងរួចទៅហើយ ដោយសារតែមិត្តភក្តិឈ្លោះប្រកែកគ្នាជាមួយក្មេងទំនើងរូបគេបានចូលទៅឃាត់ និងធ្វើអន្តរាគមន៍ក៏ត្រូវគេចាក់ធ្លាយពោះ ចូលដេកក្នុងមន្ទីរពេទ្យបង្អែកនៅទីនោះ ដោយឪពុកម្តាយជនល្មើសបង់ឱ្យចំនួន១.០០០ដុល្លារអាមេរិកសម្រាប់ព្យាបាលជំងឺ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ