រាជធានីភ្នំពេញ ៖ អនុរដ្ឋលេខាធិការក្រសួងទេសចរណ៍ និងជាប្រធានគណៈកម្មការសុវត្ថិភាពកុមារក្នុងវិស័យទេសចរណ៍ លោកហោ សារុន បានថ្លែងនៅថ្ងៃទី២២ សីហា ២០១២ នេះថា ទេសចរណ៍ផ្លូវភេទលើកុមារក្នុងប្រទេសកម្ពុជា បានកាត់បន្ថយមកនៅចំនួនតិចតួចបំផុត គឺមានត្រឹមតែ១០០នាក់ចុះក្រោម ប៉ុណ្ណោះ ក្នុងចំណោមភ្ញៀវទេសចរអន្តរជាតិចំនួន២លាន៨សែននាក់ ដែលចូលមកកម្សាន្តនៅកម្ពុជាកាលពីឆ្នាំ២០១១ ។
ថ្លែងនៅក្នុងពិធីចុះអនុស្សារណៈយោគយល់គ្នា MOU រវាងក្រសួងទេសចរណ៍ និងអង្គការទស្សនៈពិភពលោក និងការប្រកាសភាពជាដៃគូ លុបបំបាត់ការកេងប្រវ័ញ្ចផ្លូវភេទលើកុមារ ក្នុងវិស័យទេសចរណ៍ និងគម្រោងកុមារភាព-ផ្នែកបង្ការ ដើម្បីកសាងនិងពង្រឹងសមត្ថភាពមន្រ្តីរដ្ឋាភិបាល ភាគីពាក់ព័ន្ធនិងដើម្បីពង្រឹងយន្តការថ្នាក់ជាតិសំដៅទប់ស្កាត់ការកេងប្រវ័ញ្ចផ្លូវភេទលើកុមារក្នុងវិស័យទេសរណ៍ដែលប្រារព្ធធ្វើនៅរាជធានីភ្នំពេញនាព្រឹកថ្ងៃទី២២ សីហា ២០១២នេះ លោក ហោ សារុន អនុរដ្ឋលេខាធិការក្រសួងទេសចរណ៍ និងជាប្រធានគណៈកម្មការសុវត្ថិភាពកុមារ ក្នុងវិស័យទេសចរណ៍បានបន្តទៀតថា ការកេងប្រវ័ញ្ចផ្លូវភេទលើកុមារ ក្នុងវិស័យទេសចរណ៍ មានការកាត់បន្ថយជាខ្លាំង ដោយសារក្រសួងទេសចរណ៍បានសហការជាមួយក្រសួងពាក់ព័ន្ធនានា ពិសេសក្រសួងមហាផ្ទៃដោយបានបង្កើតគណៈកម្មការមួយ ដែលមានរដ្ឋមន្រ្ដីក្រសួងមហាផ្ទៃជាប្រធាន សម្រាប់ទប់ស្កាត់ការកេងប្រវ័ញ្ចផ្លូវភេទលើកុមារ និងចាត់វិធានការបង្រ្កាប រាល់បទល្មើសផ្លូវភេទលើកុមារក្នុងវិស័យទេសចរណ៍នេះ ។
លោកអនុរដ្ឋលេខាធិការក្រសួងទេសចរណ៍និងជាប្រធានគណៈកម្មការសុវត្ថិភាពកុមារ ក្នុងវិស័យទេសចរណ៍ហោ សារុន បានឲ្យដឹងទៀតថា នៅក្នុងតំបន់អាស៊ានប្រទេសកម្ពុជាមានការកេងប្រវ័ញ្ចផ្លូវភេទលើកុមារក្នុងវិស័យទេសចរណ៍នេះ មិនស្ថិតក្នុងលក្ខណៈធ្ងន់ធ្ងរជាងគេនោះទេដោយប្រទេសកម្ពុជាបានទទួលចំណាត់ថ្នាក់លេខ២ពីការវាយតម្លៃរបស់ក្រសួងការបរទេសសហរដ្ឋ
អាមេរិកសម្រាប់ការប្រឹងប្រែង លុបបំបាត់ការកេងប្រវ័ញ្ចពលកម្មលើកុមារពិសេសបានប្រឹងប្រែងលុបបំបាត់ទេសចរណ៍ផ្លូវភេទលើកុមារតែម្ដង៕
ចែករំលែកព័តមាននេះ