ខេត្តកណ្តាល ៖ ម៉ូតូ២គ្រឿងបើកបញ្ច្រាសទិសគ្នាបានបុកគ្នាចំពីមុខពេញទំហឹង បណ្តាលឱ្យអ្នកបើក និងអ្នកជិះពីក្រោយ៤នាក់រងរបួសធ្ងន់សន្លប់ដេករដូករណែលលើផ្លូវ កាលពីវេលាម៉ោង៥និង៣០នាទីល្ងាចថ្ងៃទី២១ សីហា នៅលើកំណាត់ផ្លូវជាតិលេខ១១០ ស្ថិតក្នុងភូមិព្រែកតាប្រាក់ ឃុំតាលន់ ស្រុកស្អាង ។ ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅកាន់មន្ទីរពេទ្យកាល់ម៉ែត រាជធានីភ្នំពេញ ។
មន្ត្រីប៉ូលិសបានឱ្យដឹងថា ជនរងគ្រោះឈ្មោះវិន ង៉ែត ភេទប្រុស អាយុ១៩ឆ្នាំ ជាអ្នកបើកម៉ូតូសេ១២៥ ពណ៌ខ្មៅ ស៊េរីឆ្នាំ២០១០ រងរបួសដៃជើង និងខ្លួនជាច្រើនកន្លែង និងម្នាក់ទៀតជិះពីក្រោយឈ្មោះភាន់ សុភាស់ ភេទប្រុស អាយុ២០ឆ្នាំ រងរបួសបាក់ស្មងជើងខាងស្តាំ អ្នកទាំង២មានទីលំនៅភូមិខ្ពបក្រោម ឃុំខ្ពប ស្រុកស្អាង ។ ចំណែកអ្នកបើកម៉ូតូម៉ាកគុបមូល ឈ្មោះម៉ើ បន ភេទប្រុស អាយុ២០ឆ្នាំរងរបួសធ្ងន់ និងអ្នករួមដំណើរម្នាក់ទៀតឈ្មោះម៉ើ មន ភេទប្រុស អាយុ៣០ឆ្នាំ រងរបួសធ្ងន់ អ្នកទាំង២នាក់មានទីលំនៅក្នុងភូមិ-ឃុំកើតហេតុ។
សាក្សីនិយាយថា នៅវេលាម៉ោងខាងលើ មានម៉ូតូសេ១២៥ ពណ៌ខ្មៅ មួយគ្រឿង ជិះគ្នា២នាក់ បើកតាមផ្លូវជាតិលេខ១១០ ពីត្បូងទៅជើង លុះមកដល់ចំណុចកើតហេតុមានម៉ូតូមួយគ្រឿងទៀតម៉ាកគុបមូលបើកបញ្ច្រាសទិសគ្នាពីជើងទៅត្បូងល្បឿនមធ្យម ហើយបុកគ្នាតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ