ការវិវឌ្ឍឥតឈប់ឈរនៃបច្ចេកវិទ្យាលើវិស័យទូរគមនាគមន៍, ព័ត៌មានវិទ្យា និងអីុនធើរណេតនៅលើសកលលោកបានជំរុញឱ្យព្រះរាជាណាចក្រកម្ពុជា ដែលជាប្រទេសកំពុងអភិវឌ្ឍបានឈានជំហានយ៉ាងលឿននាប៉ុន្មានទសវត្សចុងក្រោយនេះ ហើយបានភ្ជាប់សរសៃឈាមសេដ្ឋកិច្ចជាមួយបណ្តាប្រទេសមហាអំណាចនានា ទាំងលើសកលលោក ទាំងក្នុងតំបន់ ។ ទាំងនេះក៏ដោយសាររាជរដ្ឋាភិបាលនៃព្រះរាជាណាចក្រកម្ពុជាបានពុះពារគ្រប់ឧបសគ្គកសាងបាននូវ ហេដ្ឋារចនាសម្ព័ន្ធ ទូរគមនាគមន៍ ធ្វើឱ្យចំនួនប្រតិបត្តិករទូរស័ព្ទចល័ត និងអចល័ត, ទូរស័ព្ទលើបណ្តាញអីុនធើរណេត, ប្រតិបត្តិករផ្តល់ និងចែកចាយសេវាអីុនធើរណេតមានការកើតឡើងជាច្រើន បង្កភាពងាយស្រួល, ផ្តល់ទំនុកចិត្ត និងសក្តានុពលដល់អ្នកវិនិយោគបរទេសដែលនឹងជួយជំរុញកំណើនសេដ្ឋកិច្ចជាតិឱ្យកាន់តែមានភាពប្រសើរឡើង។
អនុលោមតាមប្រសាសន៍លោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍នៃព្រះរាជាណាចក្រកម្ពុជា ក្នុងពិធីបើកសម្ពោធក្រុមហ៊ុនផ្តល់សេវាអីុនធើរណេត Mega Investment & Telecom Limited(www.mega.com.kh) កាលពីពេលកន្លងទៅ ចំនួនអ្នកប្រើប្រាស់អីុនធើរណេតក្នុងព្រះរាជាណាចក្រកម្ពុជា បច្ចុប្បន្នមានប្រមាណ១,៦លាននាក់ គឺមានការកើនឡើងរហូតដល់ជាង១០ដងធៀបនឹងឆ្នាំ២០១០ ។ ទោះបីយ៉ាងនេះក្តី ចំនួនអ្នកប្រើប្រាស់នេះ គឺមានត្រឹមតែ១១% នៃចំនួនប្រជាជនសរុបទូទាំងប្រទេសប៉ុណ្ណោះ ។
ដូច្នេះការចាប់ផ្តើមរបស់ក្រុមហ៊ុន “MEGA” នៅពេលនេះ គឺបំបេញនូវសេចក្តីត្រូវការបន្ថែម និងនាំមកនូវសេវាកម្មល្អឥតខ្ចោះដែលអ្នកប្រើប្រាស់ទាំងឡាយទន្ទឹងរង់ចាំ ។ លោកថូ ដា នាយកក្រុមហ៊ុន Mega Investment & Telecom Limited “MEGA” បានបញ្ជាក់ប្រាប់អ្នកយកសារព័ត៌មានយើងថា ជាមួយទស្សនៈវិស័យយូរអង្វែង ក្រុមហ៊ុនបានវិនិយោគ និងកសាងហេដ្ឋារចនាសម្ព័ន្ធបណ្តាញខ្សែកាប្លអុបទិក (Optic Fiber) ជាមួយបច្ចេកវិទ្យាថ្មី ចុងក្រោយប្រកបដោយសក្តានុពល រួមទាំងបណ្តាញបម្រុង (Backup) គ្របដណ្តប់ទូទាំងខេត្ត-ក្រុង នៃព្រះរាជាណាចក្រកម្ពុជា ដើម្បីផ្តល់សេវាទូរគមនាគមន៍ទាំងទិន្នន័យ (Data) និងសំឡេង (Voice) កាត់បន្ថយក្តីបារម្ភ និងការខាតបង់ពេលវេលារបស់អ្នកប្រើប្រាស់ ។ ក្រៅពីនេះក្រុមហ៊ុននៅមានក្រុមអ្នកបច្ចេកទេសបំពាក់ដោយសម្ភារ និងមធ្យោបាយចុះដល់ទីកន្លែងទាន់ពេលវេលា, មានមជ្ឈមណ្ឌលចាំទទួលទូរស័ព្ទ (Call Center) រង់ចាំបម្រើ និងដោះស្រាយបញ្ហាជូន២៤ម៉ោង, មានក្រុម (Functional Team) សម្រាប់ជួយសម្រួលការងារបន្ទាប់បន្សំក្រៅម៉ោងធ្វើការដល់អតិថិជនដែលស្ថិតក្នុងតំបន់រស់នៅរបស់ខ្លួន មុនពេលអ្នកបច្ចេកទេសជំនាញទៅដល់, មានក្រុមបច្ចេកទេសជំនាញអាចប្រឹក្សាយោបល់ ដើម្បីរកដំណោះស្រាយបច្ចេកទេស (Solution Team) សម្រាប់សហគ្រាសនានាមុនពេលសម្រេចចិត្តនូវជម្រើសណាមួយ ។ កត្តាទាំងនេះហើយ ទើបធ្វើឱ្យយើងទទួលបាននូវទំនុកចិត្តយ៉ាងឆាប់រហ័សពីសំណាក់អតិថិជនដែលត្រឹមតែរយៈពេល៣ខែ ក្រោយការបើកសម្ពោធក្រុមហ៊ុនទទួលបានអតិថិជន ជាសហគ្រាសអាជីវកម្ម, សាជីវកម្ម, រោងចក្រ, សណ្ឋាគារ, ធនាគារ, ស្ថានទូត និងអង្គការក្រៅរដ្ឋាភិបាលដែលមានទីស្នាក់ការរបស់ខ្លួននៅក្នុងព្រះរាជាណាច្រកម្ពុជា ដ៏ច្រើនលើសលុបពីចំនួនដែលបានព្យាករណ៍ទុក ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ