កីឡាករប្រណាំងម៉ូតូជីភីអាមេរិកនីកគី ហេដឹនបានសម្រេចចិត្តលុបចោលការចូលរួមរបស់ខ្លួនក្នុងកម្មវិធី Czech Grand Prixនៅសាធារណរដ្ឋឆែកចុងសប្តាហ៍នេះក្រោយពីបានរងគ្រោះថ្នាក់របួសដៃអំឡុងការប្រណាំងវគ្គជម្រុះនៅក្រុង Indianapolisសហរដ្ឋអាមេរិកសប្តាហ៍កន្លងមក ។
បើទោះណា អវត្តមានពីការប្រណាំងដែលនឹងចាប់ផ្តើមនៅថ្ងៃទី២៥សីហានេះក៏ដោយ ប៉ុន្តែកីឡាករវ័យ៣១ឆ្នាំរូបនេះសង្ឃឹមនឹងវិលសាជាថ្មីក្នុងកម្មវិធី San Marino Grand Prixនៅខែក្រោយ ។ គេបាននិយាយថា ៖«វាជាការសម្រេចចិត្តដ៏សែនពិបាកបំផុតក្នុងការបោះបង់កម្មវិធីណាមួយ ។ វេជ្ជបណ្ឌិតបានប្រាប់ខ្ញុំថា ការចូលរួមប្រណាំងជាយោបល់អាក្រក់ ហើយក្រុមរបស់ខ្ញុំក៏បានយល់ព្រមផងដែរ »។
សូមបញ្ជាក់ថា ហេដិនបច្ចុប្បន្នបើកបរឱ្យក្រុម Ducatiដែលមានម៉ូតូពាក់ស្លាកលេខ ៦៩ ។គេធ្លាប់បានយកឈ្នះពានជើងឯកពិភពលោកចំនួន១លើកកាលពីឆ្នាំ ២០០៦ ។ ឆ្នាំ ២០១១ គេស្ថិតនៅលំដាប់ទី៨នៃតារាងជើងឯកពិភពលោក ។ ដោយឡែកនៅរដូវកាលប្រណាំងឆ្នាំ ២០១២នេះ គេពុំទាន់បានយកឈ្នះពានជើងឯកកម្មវិធីណាមួយនៅឡើយទេ ៕
ចែករំលែកព័តមាននេះ