ខេត្តកំពត ៖ ការដឹកសំពីងសំពោងលើសចំណុះជាច្រើននៅតាមដងផ្លូវសាធារណៈមិនឃើញមានសមត្ថកិច្ចចាត់វិធានការតឹងរឹុងតាមផ្លូវច្បាប់នៅឡើយទេ តែបែរជាយកលុយមិនឱ្យរំលងយានយន្តណាមួយឡើយ ។ តួយ៉ាង រ៉ឺម៉កម៉ូតូមួយគ្រឿងផ្ទុកអីវ៉ាន់គ្រឿងទេសសំពីងសំពោង ដឹកចេញពីច្រកព្រំដែនព្រែកចាក យកទៅឱ្យម៉ូយនៅផ្សារទីរួមខេត្តកំពត ដោយធ្វើដំណើរឆ្លងកាត់ស្រុកពីរ គឺស្រុកដំណាក់ចង្អើរ ខេត្តកែប និងស្រុកទឹកឈូ ខេត្តកំពត តាមបណ្តោយផ្លូវជាតិលេខ៣៣ ឆ្លងកាត់មុខប៉ុស្តិ៍យាមប្រចាំការនៅផ្លូវបំបែកភូមិតាអេង ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត ចូលមកទីរួមខេត្តកំពត ។
ការដឹកទំនិញសំពីងសំពោងពិបាកមើល និងអាចបង្កឱ្យមានគ្រោះថ្នាក់ជាយថាហេតុនេះ ត្រូវបានប្រជាពលរដ្ឋរិះគន់យ៉ាងខ្លាំងទៅលើសមត្ថកិច្ចចរាចរដែលដាក់កុងត្រូលជាច្រើនកន្លែងសម្រាប់ត្រួតពិនិត្យលើការអនុវត្តខុសច្បាប់ចរាចរណ៍ តាំងពីការបើកបរមិនពាក់មួកសុវត្ថិភាព ម៉ូតូគ្មានស្លាកលេខ និងការផ្ទុកទំនិញលើសចំណុះគ្រប់ប្រភេទ តែផ្ទុយទៅវិញ បែរជាសមត្ថកិច្ចដែលដាក់កុងត្រូលប្រចាំការជាច្រើនកន្លែងនោះ គ្មានរវល់អើពើរឿងផ្ទុកទំនិញហួសចំណុះឡើយ គឺដឹងតែពីយកលុយពីអ្នកល្មើសទាំងនោះ។
ទាក់ទិននឹងករណីខាងលើ កោះសន្តិភាព មិនអាចទាក់ទងសុំការបំភ្លឺពីលោក ណុប សារ៉េត ប្រធានការិយាល័យចរាចរណ៍ផ្លូវគោកនៃស្នងការដ្ឋាននរគរបាលខេត្តបានទេ ដោយសារទូរស័ព្ទមិនអាចទំនាក់ទំនងបាន ។ ពលរដ្ឋសំណូមពរឱ្យសមត្ថកិច្ចចរាចរខេត្ត មេត្តាកុំដាក់កុងត្រូលសម្រាប់តែយកលុយត្រូវយកច្បាប់មកអនុវត្តទើបត្រូវ ៕
ចែករំលែកព័តមាននេះ