រាជធានីភ្នំពេញ ៖ រថយន្តកូរ៉ូឡា ពណ៌ស្ករ មួយគ្រឿងបើកដោយបុរសស្រវឹងជោកម្នាក់ក្នុងល្បឿនលឿន និងរេចង្កូតពេញផ្លូវក៏ជ្រុលទៅបុកម៉ូតូកូនទា ពណ៌ស មួយគ្រឿងជិះគ្នា២នាក់ ចំពីក្រោយពេញទំហឹងធ្វើឱ្យម៉ូតូ និងអ្នកជិះទាំង២នាក់នោះហោះខ្ទាតប្រហែល៣០ម៉ែត្រ បណ្តាលឱ្យនារីម្នាក់ជិះពីក្រោយស្លាប់ភ្លាមៗនៅនឹងកន្លែង ។ ដោយឃើញដូចនោះរថយន្តបង្កហេតុព្យាយាមបើករត់ក៏ជ្រុលចង្កូតទៅបុករបាំងដែកចែកផ្លូវបាក់អស់៩ផ្ទាំង រួចបន្តទៅបុកដើមក្ងោកបាក់មួយដើមទៀត ទើបទៅមុខលែងរួចក៏បើកទ្វាររថយន្តចុះរត់គេចខ្លួនតែត្រូវប្រជាពលរដ្ឋដែរឃើញហេតុការណ៍នោះនាំគ្នាដេញតាមចាប់បាន ហើយប្រគល់ឱ្យសមត្ថកិច្ចកាលពីវេលាម៉ោង២និង១៥នាទីរំលងអធ្រាត្រឈានថ្ងៃទី២២ សីហា ២០១២ នៅចំណុចមុខក្រុមហ៊ុនមីតស៊ុយ (ខេមបូឌា) តាមបណ្តោយមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ។
បុរសស្រវឹងស្រាបើករថយន្តបង្កហេតុឈ្មោះស៊ាង គីមស្រ៊ុង អាយុ២៦ឆ្នាំ ជាអ្នកលក់ដូរនៅផ្ទះ ស្នាក់នៅសង្កាត់ចោមចៅ ខណ្ឌពោធិ៍សែនសជ័យ។ ចំណែកអ្នកបើកម៉ូតូកូនទា ពណ៌ស របួសធ្ងន់ឈ្មោះរឿន វរៈ ភេទប្រុស អាយុ២៣ឆ្នាំ ស្នាក់នៅផ្ទះលេខ១១៣E1Z ផ្លូវលេខ២៧១ ក្រុម៤៦ សង្កាត់បឹងសាឡាង ខណ្ឌទួលគោក ។ រីឯសពនារីម្នាក់ទៀតដែរ ជិះពីក្រោយមិនស្គាល់អត្តសញ្ញាណត្រូវបានសមត្ថកិច្ចយកទៅទុកនៅវត្តទឹកថ្លារង់ចាំសាច់ញាតិបងប្អូនមកយកទៅធ្វើបុណ្យ ។
យោងតាមសម្តីលោកស៊ិន សុវណ្ណ នាយរងផ្នែកសណ្តាប់ធ្នាប់ចរាចរណ៍ជើងគោក ខណ្ឌសែនសុខ ឱ្យដឹងថា មុនពេលកើតហេតុរថយន្តម៉ាកកូរ៉ូឡា ពណ៌ស្ករ មួយគ្រឿងបើកដោយបុរសស្រវឹងជោកម្នាក់បានបោះពួយយ៉ាងលឿនតាមផ្លូវសហព័ន្ធរុស្ស៊ីក្នុងទិសដៅពីកើតទៅលិច និងរេចង្កូតពេញផ្លូវទៅបុកម៉ូតូកូនទាពណ៌ស មួយគ្រឿង ជិះគ្នា២នាក់ ស្រីម្នាក់ ប្រុសម្នាក់ ចំពីក្រោយពេញទំហឹងតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ