ខេត្តពោធិ៍សាត់ ៖ ផ្ទះទេវតាចំនួន២ខ្នងធ្វើអំពីឈើប្រក់ស័ង្កសីក្រាលក្តារជញ្ជាំងក្តារបន្តើតជើងតាងទំហំ៥ម៉ែត្រគុណ៦ម៉ែត្រ ជាអំណោយដ៏ថ្លៃថ្លារបស់លោករដ្ឋមន្ត្រី ស៊ុយ សែម ប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ និងលោកជំទាវ ជា ខេង បានសាងសង់រួចរាល់ជាស្ថាពរហើយ ដើម្បីជូនស្ត្រីមេម៉ាយត្រូវភ្លើងឆេះផ្ទះ និងម្តាយរបស់នាងជាស្ត្រីមេម៉ាយហើយក្រីក្រដូចគ្នា។
លោកស៊ុម លើម អនុប្រធានក្រុមការងារចុះជួយសង្កាត់ចំរើនផលបានប្រាប់កោះសន្តិភាពថា កាលពីខែមុននេះប្រជាពលរដ្ឋឈ្មោះហៃ មុំ អាយុ៣៣ឆ្នាំ ជាស្ត្រីមេម៉ាយមានកូន៣នាក់ នៅភូមិទួលគ្រួស សង្កាត់ចំរើនផល ក្រុងពោធិ៍សាត់ រវល់ទៅធ្វើកម្មករសំណង់ដើម្បីយកប្រាក់មកចិញ្ចឹមកូន ស្រាប់តែភ្លើងឆេះផ្ទះហ្មត់គ្មានសល់អ្វីទាំងអស់ ។ ភ្លាមៗនោះក្រុមការងារបានរាយការណ៍ជូនទៅថ្នាក់លើ និងបានកាសែតកោះសន្តិភាពចុះផ្សាយផងនោះ ទើបលោកជំទាវ ជា ខេង ស៊ុយ សែម បានចុះមកដល់កន្លែងកើតហេតុផ្ទាល់ ។ ដោយពិនិត្យឃើញជាក់ស្តែងផ្ទះទាំងមូលត្រូវភ្លើងឆេះគ្មានសេសសល់អ្វី និងម្ចាស់ផ្ទះជាស្ត្រីមេម៉ាយកូន៣ ក្រីក្រធ្វើកម្មករសំណង់រកលុយមកចិញ្ចឹមកូនយ៉ាងលំបាកវេទនាផងនោះ លោកជំទាវមានការអាណិតអាសូរក៏សម្រេចសាងសង់ផ្ទះមួយខ្នងជូន ដើម្បីបានរស់នៅឡើងវិញ ។ ជាមួយគ្នានេះដោយឃើញម្តាយរបស់នាងឈ្មោះមុំ នី អាយុ៥៩ឆ្នាំ ជាស្ត្រីមេម៉ាយក្រីក្រផ្ទះបាំងធាងដួងដំបូលលេចធ្លុះធ្លាយ សសរ និងក្តារក្រាលពុកអស់រលីងទៅហើយក៏ជូនមួយខ្នងទៀតនៅក្បែរគ្នា រួចបានប្រគល់ការងារនេះឱ្យក្រុមការងារ និងអាជ្ញាធរមូលដ្ឋានជួយចាត់ចែង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ