រាជធានីភ្នំពេញ ៖ លោក Ron Kirk តំណាងពាណិជ្ជកម្មសហរដ្ឋអាមេរិក និងជាទីប្រឹក្សាសេដ្ឋកិច្ចរបស់លោកបារ៉ាក់ អូបាម៉ា ប្រធានាធិបតីអាមេរិក នឹងអញ្ជើញទៅកាន់ខេត្តសៀមរាប នៃប្រទេសកម្ពុជា នៅថ្ងៃទី៣០-៣១ សីហា ២០១២ ដើម្បីចូលរួមក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំកំពូលផ្នែកធុរកិច្ច សហរដ្ឋអាមេរិកអាស៊ាន ។ ប្រទេសអាស៊ានទាំង១០ គឺជាដៃគូសេដ្ឋកិច្ច និងជាយុទ្ធសាស្ត្រសំខាន់សម្រាប់សហរដ្ឋអាមេរិក ហើយដំណើរទស្សនកិច្ចរបស់តំណាងពាណិជ្ជកម្ម សហរដ្ឋអាមេរិក លោក Kirk នៅក្នុងប្រទេសកម្ពុជា នឹងបញ្ជាក់ឱ្យឃើញការគាំទ្ររបស់សហរដ្ឋអាមេរិកចំពោះសមាហរណកម្មរបស់អាស៊ាន និងបំណងក្នុងការធ្វើឱ្យការទាក់ទងគ្នាផ្នែកសេដ្ឋកិច្ច ជាមួយតំបន់នេះមានភាពជ្រាលជ្រៅ ព្រមទាំងសង្កត់ធ្ងន់លើគោលដៅរួមរបស់សហរដ្ឋអាមេរិកលើទំនាក់ទំនងសេដ្ឋកិច្ចនៅតំបន់អាស៊ីប៉ាស៊ីហ្វិក ។
តំណាងពាណិជ្ជកម្មអាមេរិក Ron Kirk គ្រោងនឹងជួបប្រជុំផងដែរ ជាមួយក្រុមប្រឹក្សាសម្របសម្រួលក្របខណ្ឌវិនិយោគ និងពាណិជ្ជកម្ម (TIFA) រវាងសហរដ្ឋអាមេរិក និងអាស៊ានដែលជាកិច្ចប្រជុំ ក្រៅផ្លូវការមួយនៃរដ្ឋមន្ត្រីសេដ្ឋកិច្ចក្នុងកិច្ចប្រជុំកំពូលអាស៊ីខាងកើត និងកិច្ចប្រជុំធុរកិច្ចកំពូលជាលើកដំបូងរវាងសហរដ្ឋអាមេរិក និងអាស៊ាន ។
កិច្ចប្រជុំធុរកិច្ចកំពូលជាលើកដំបូងរវាងសហរដ្ឋអាមេរិក និងអាស៊ានផ្តល់ឱកាសឱ្យតំណាងធុរកិច្ចរបស់សហរដ្ឋអាមេរិក និងអាស៊ានធ្វើការផ្លាស់ប្តូរទស្សនៈលើការជំរុញកំណើនសេដ្ឋកិច្ច ការបញ្ចូលបច្ចេកទេសថ្មីៗ ហើយបង្ហាញអនុសាសន៍រួមក្នុងការពិភាក្សាដោយផ្ទាល់ជាមួយមន្ត្រីពាណិជ្ជកម្មអាស៊ាន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ