បណ្តាមន្ត្រីកូរ៉េខាងត្បូងថ្លែងកាលពីថ្ងៃទី២១ សីហា ថា ប្រទេសកូរ៉េខាងត្បូងនឹងបដិសេធសំណើផ្លូវការដែលគ្រោងធ្វើដោយជប៉ុន ដើម្បីលើកឡើងពីរឿងជម្លោះប្រជុំកោះ DOKDO នៅឯតុលាការយុត្តិធម៌អន្តរជាតិក្រុងឡាអេដោយអះអាងថា ជំហររបស់កូរ៉េខាងត្បូងគឺថាពុំមានជម្លោះដែនដីនៅប្រជុំកោះនេះឡើយ ព្រោះជាដែនដីមួយរបស់កូរ៉េខាងត្បូង ។
សំណើមាត់ទទេមួយត្រូវបានបដិសេធភ្លាមៗដោយកូរ៉េខាងត្បូងកាលពីថ្ងៃទី១៧ សីហា កន្លងមកនេះ ក៏ប៉ុន្តែក្រុងតូក្យូ ត្រូវបញ្ជូនកំណត់ហេតុមួយជាឯកសារការទូតពុំមានចុះហត្ថលេខា ក៏ប៉ុន្តែជាផ្លូវការជាងសំណើតាមពាក្យសម្តីឱ្យដល់កូរ៉េខាងត្បូងនាថ្ងៃទី២១ សីហា ក្រោយកិច្ចប្រជុំរបស់គណៈរដ្ឋមន្ត្រី ។
មន្ត្រីជាន់ខ្ពស់ម្នាក់នៃក្រសួងការបរទេសកូរ៉េខាងត្បូងថ្លែងថា ជំហររបស់យើងច្បាស់បំផុតគឺ ពុំមានជម្លោះដែនដីលើប្រជុំកោះ DOKDO ឡើយ ព្រោះវាជាដែនដីប្រវត្តិសាស្ត្រ និងភូមិសាស្ត្ររបស់កូរ៉េបើយោងតាមច្បាប់អន្តរជាតិ ។អាស្រ័យហេតុនេះ យើងពុំមានហេតុផលណាមួយត្រូវទៅកាន់តុលាការយុត្តិធម៌អន្តរជាតិឡើយ ។ទំនាក់ទំនងរវាងប្រទេសទាំង២ធ្លាក់ចុះដុនដាបដោយឆាប់រហ័សក្រោយទស្សនកិច្ចពុំធ្លាប់មានពីមុនមករបស់ប្រធានាធិបតីកូរ៉េខាងត្បូងលោកលី ម្យុងបាក់ នៅប្រជុំកោះ DOKDO កាលពីថ្ងៃទី១០ សីហា កន្លងមកនេះ៕
ចែករំលែកព័តមាននេះ