ADផ្ទាំងផ្សព្វផ្សាយពាណិជ្ជកម្ម

ចូលប្លន់ក្នុងផ្ទះកណ្តាលអធ្រាត្របានមាស៦ជី

13 ឆ្នាំ មុន

២១ ខែ សីហា ឆ្នាំ ២០១២ ម៉ោង ០៤:៣០

ខេត្តកោះកុង ៖ កាលពីវេលាម៉ោង២រំលងអធ្រាត្រឈានចូលថ្ងៃទី២១ សីហា ២០១២ មានករណីប្លន់មួយបានកើតឡើងនៅចំណុចភូមិ-សង្កាត់ស្មាច់មានជ័យ ក្រុងខេមរភូមិន្ទ ដោយមានក្រុមចោរមួយក្រុមមានគ្នា៤នាក់ ស្លៀកពាក់ខោអាវប៉ារ៉ា និងមានម៉ាសបិទមុខចូលទៅប្លន់ដល់ក្នុងផ្ទះប្រជាពលរដ្ឋដោយប្រើអាវុធខ្លីភ្ជង់ក្បាល រួចប្លន់យកមាសបានចំនួន៦ជី ។

តាមសាក្សីនៅជុំវិញផ្ទះពលរដ្ឋរងគ្រោះអះអាងថា ម្ចាស់ផ្ទះរងគ្រោះឈ្មោះកែវ ញ៉ី ភេទស្រី អាយុ៥១ឆ្នាំ និងប្តីឈ្មោះសូត ណុះ អាយុ៥៥ឆ្នាំ និងជាកម្មករសំណង់ ហើយនៅវេលាព្រឹកព្រហាមម្ចាស់ផ្ទះទាំង២នាក់ប្តីប្រពន្ធមិនទាន់ដឹងខ្លួនស្រួលបួលនៅឡើយទេ ព្រោះក្រុមចោរបានប្រើថ្នាំសណ្តំ ។ តាមសម្តីប្តីប្រពន្ធទាំង២នាក់បានរៀបរាប់ថា នៅខណៈពេលខាងលើស្ត្រីជាប្រពន្ធធុំក្លិនក្រអូបភាយពេញផ្ទះ ពេលនោះរូបគាត់ក៏ភ្ញាក់ក្រោកឡើងមើលក្នុងផ្ទះតែពេលដែលគាត់ក្រោកឡើង ស្រាប់តែក្រុមចោរបានប្រើកាំភ្លើងខ្លីភ្ជង់ក្បាលរបស់គាត់រួចគំរាមយកមាស និងលុយ ប៉ុន្តែរូបគាត់ឆ្លើយថា អត់មាន ។ ដោយឮគាត់ឆ្លើយយ៉ាងដូច្នេះក៏អូសដៃស្ត្រីជាប្រពន្ធទៅខាងក្រោយផ្ទះ បម្រុងបាញ់សម្លាប់ចោល ប៉ុន្តែមានចោរម្នាក់ប្រាប់គ្នាគេថា កុំសម្លាប់គាត់អី ពេលនោះពួកវាក៏ដឹកដៃគាត់មកចងជាប់នឹងជណ្តើរផ្ទះ ដោយយកស្បៃក្រណាត់ញាត់មាត់ រួចឡើងរុះរើយកមាសអស់ចំនួន៦ជី បន្ទាប់មករត់គេចខ្លួនបាត់អស់ ។