បរិមាណផលិតប្រេងឆៅរបស់ប្រទេសអារ៉ាប៊ីសាអ៊ូឌីត បានបង្កើតឯតទគ្គកម្មក្នុងអំឡុងពេលជាង៣ទសវត្សគិតត្រឹមខែមិថុនា កន្លងមក ជាហេតុធ្វើឱ្យប្រទេសនោះកាន់តំណែងជាប្រទេសផលិតប្រេងដ៏ធំជាផ្លូវការនៅលើពិភពលោក ។នៅក្នុងរបាយការណ៍ ដោយយោងលើទិន្នន័យពីវេបសាយ Joint Organization Data Initiative (JODI) និងតួលេខដែលអាជ្ញាធរអារ៉ាប៊ីសាអូ៊ឌីត ស្នើដល់អង្គការរបស់ក្រុមប្រទេសនាំចេញប្រេង (Opec) មានសមាជិកចំនួន១២ប្រទេស បញ្ជាក់ថា បរិមាណការផលិតប្រេងរបស់អារ៉ាប៊ីសាអ៊ូឌីត ក្នុងខែមិថុនា កន្លងមក បានកើនឡើង ១០,១លានធុងក្នុងមួយថ្ងៃ ឬខ្ពស់ជាងខែឧសភាប្រហែល៣% និងចាត់ទុកថាជាខែដែលអារ៉ាប៊ីសាអ៊ូឌីតនាំចេញប្រេងច្រើនបំផុតចាប់តាំងពីខែវិច្ឆិកា ឆ្នាំ២០០៥ រហូតមក ។
បរិមាណប្រេងឆៅ ដែលប្រទេសអារ៉ាប៊ីសាអ៊ូឌីតផលិតដាក់លក់ក្នុងទីផ្សារពិភពលោកក្នុងមួយថ្ងៃ១០,១លានធុងនោះ អាចធ្វើឱ្យអារ៉ាប៊ីសាអ៊ូឌីត ផលិតប្រេងដ៏ធំរបស់ក្រុមអូប៉ិច និងក្លាយជាអ្នកផលិតប្រេងស្ថិតក្នុងលំដាប់ទី១ថ្មីនៅលើពិភពលោក នាំមុខរុស្ស៊ីដែលផលិតប្រេងបានត្រឹម៩,៩លានធុងក្នុងមួយថ្ងៃ ស្ថិតនៅអំឡុងពេលដូចគ្នា ។ស្របពេលជាមួយគ្នានេះ នៅក្នុងរបាយការណ៍របស់ JODI បញ្ជាក់ថា វេណេស៊ុយអេឡា ដែលមានឈ្មោះថា មានបរិមាណប្រេងនៅក្នុងដីច្រើនបំផុតនៅលើពិភពលោកបច្ចុប្បន្ននាំចេញកើនឡើងដល់១០,៦% ស្ថិតក្នុងកម្រិត១,៧២លានធុងក្នុងមួយថ្ងៃនៃខែមិថុនា កន្លងមក ខណៈពេលប្រទេសនីហ្សេរីយ៉ា ជាមហាអំណាចប្រេងនៅទ្វីបអាហ្វ្រិក បាននាំចេញប្រេងក្នុងខែមិថុនា កើនលើសពីខែឧសភា ដល់ទៅ១៨% ស្ថិតក្នុងកម្រិត២,៤៩លានធុងក្នុងមួយថ្ងៃ ដោយចាត់ទុកថា ប្រទេសទាំង២ស្ថិតក្នុងចំណាប់អារម្មណ៍បំផុតក្នុងត្រីមាសទី២ ឆ្នាំ ២០១២ ។
ទោះជាយ៉ាងណាក៏ដោយ ប្រទេសអីុរ៉ាក់ ដែលនាំមុខអ៊ីរ៉ង់ គ្រងតំណែងជាអ្នកផលិតប្រេងដ៏ធំ ស្ថិតនៅលំដាប់ទី២របស់ក្រុមអូប៉ិច បន្ទាប់ពីអារ៉ាប៊ីសាអ៊ូឌីត និងជាលើកដំបូងក្នុងអំឡុងពេល២៤ឆ្នាំ បែរជាការនាំចេញប្រេងបានធ្លាក់ចុះ២% នៅសល់ត្រឹម២,៤លានធុងក្នុងមួយថ្ងៃនៅខែមិថុនា មូលហេតុ នៃផ្នែកមួយគឺកើតពីអសន្តិសុខនៅក្នុងប្រទេស ៕
ចែករំលែកព័តមាននេះ