ប្រធានាធិបតីបារាំងលោកហ្វ្រង់ស្វ័រ ហូឡង់ កាលពីថ្ងៃទី២០ សីហា បានជួបសន្ទនាជាមួយលោកឡាក់ដាប្រាហ៊ីមឺ តំណាងពិសេសរួមរបស់អ.ស.ប និងសម្ព័ន្ធអារ៉ាប់សម្រាប់ស៊ីរី ។ នាឱកាសនោះ លោកគូសបញ្ជាក់ថា ពុំអាចមានដំណោះស្រាយនយោបាយមួយនៅស៊ីរីឡើយ បើលោកបាចា អាល់អាសាដ ពុំព្រមចាកចេញពីអំណាច ។
ក្នុងការជួបពិភាក្សារយៈពេលប្រមាណជា៤០នាទីនោះ ប្រធានាធិបតីបារាំង បានអបអរចំពោះលោកប្រាហ៊ីមី ដែលត្រូវជ្រើសតាំងឱ្យកាន់តំណែងនេះ ហើយអរគុណលោកដែលព្រមទទួលយកបេសកកម្មដ៏លំបាក ដើម្បីបើកទៅរកទស្សនវិស័យថ្មីៗធានាឱ្យមានការឆ្លងកាត់នយោបាយដ៏ឆាប់រហ័សក្នុងប្រទេសនេះ ។ លោកសម្តែងពីការជួយគាំទ្ររបស់បារាំង និងស្នើដល់លោកប្រាហ៊ីមី ជួយឱ្យសម្រេចបានជាបឋមនូវការបញ្ឈប់អំពើហិង្សា ។
ចំណែកលោកប្រាហ៊ីមីវិញ បានលើកឡើងពីតួនាទីសំខាន់របស់បារាំងចំពោះអ្វីដែលកើតមានជុំវិញប្រទេសស៊ីរី ។ រីឯប្រធានាធិបតីអាមេរិកលោកបារ៉ាក់អូបាម៉ាវិញបានលើកឡើងពីលទ្ធភាពនៃអន្តរាគមន៍យោធាមួយនៅស៊ីរី ក្នុងករណីមានការចល័ត ឬការប្រើប្រាស់អាវុធគីមីក្នុងប្រទេសនេះ ដែលការប្រយុទ្ធគ្នារវាងពួកឧទ្ទាម និងកងទ័ពស៊ីរី ពុំមានការចុះថយឡើយ ពិសេសនៅក្រុងអាឡែប ។ម្យ៉ាងទៀត ក្រុងវ៉ាស៊ីនតោនបានរំលឹកជាថ្មីថា លោកបាចាអាល់ អាសាដ ត្រូវចាកចេញពីអំណាច ។
លោកអូបាម៉ាថ្លែងថា រហូតមកទល់ពេលនេះ ពុំទាន់មានបទបញ្ជាណាមួយឱ្យធ្វើអន្តរា គមន៍ដោយយោធានៅស៊ីរីឡើយ ។ ក៏ប៉ុន្តែប្រសិនបើយើងចាប់ផ្តើមមើលឃើញថា អាវុធគីមីត្រូវចល័ត ឬប្រើប្រាស់នោះ នឹងមានការផ្លាស់ប្តូរចិត្តរបស់ខ្ញុំហើយ ។ចំពោះការស្លាប់ស្ត្រីអ្នកកាសែតជប៉ុនម្នាក់នៅក្រុងអាឡែប ក្រសួងការបរទេសជប៉ុនបានអះអាងព័ត៌មាននេះ នាព្រឹកថ្ងៃទី២១ សីហា ។ អ្នកទទួលខុសត្រូវម្នាក់របស់ក្រសួងនោះនិយាយថា ស្ត្រីអ្នកកាសែតជប៉ុននេះ ពិតជាត្រូវស្លាប់ ហើយគាត់ឈ្មោះមីកា យ៉ាម៉ាម៉ូតូ អាយុ៤៥ឆ្នាំ ធ្វើការឱ្យទីភ្នាក់ងារសារព័ត៌មានជប៉ុន JAPON PRESS ។
លោកស្រីមីកាយ៉ា ម៉ូតូ ទៅយកព័ត៌មានពីការប្រយុទ្ធគ្នានៅក្រុងអាឡែប រួមជាមួយអ្នកយកព័ត៌មានជប៉ុនម្នាក់ទៀត លោកកាហ្ស៊ូតាកា សាកូ ។ ទូរទស្សន៍ជប៉ុន NHK បញ្ជាក់ថា អ្នកកាសែតជប៉ុនទាំង២នាក់នេះ ចុះយកព័ត៌មានអែបជាមួយកងទ័ពស៊ីរីសេរី (ពួកឧទ្ទាមប្រដាប់អាវុធ) ៕
ចែករំលែកព័តមាននេះ