ខេត្តកំពង់ចាម ៖ ទីតាំងហ្គេមដុះស្លែមួយកន្លែង ស្ថិតក្នុងភូមិជ្រៃបិទមាស សង្កាត់សួង ក្រុងសួង ត្រូវបានលោកផាន់ សុភ័ក្រ ព្រះរាជអាជ្ញារងអមសាលាដំបូងខេត្តដឹកនាំកម្លាំងសមត្ថកិច្ចចុះបង្ក្រាបកាលពីវេលាម៉ោង១២និង៣០នាទីថ្ងៃត្រង់ថ្ងៃទី២០ សីហា ២០១២ ដោយរឹបអូសបានទូរហ្គេមចំនួន១១គ្រឿង ព្រមទាំងឃាត់ខ្លួនម្ចាស់ហ្គេមបញ្ជូនទៅកាន់ស្នងការដ្ឋាននគរបាលខេត្តផងដែរ ។
លោកចាន់ ហោ នាយរងការិយាល័យកណ្តាលយុត្តិធម៌ខេត្តឱ្យកោះសន្តិភាពដឹងថា កន្លងទៅលោកវរសេនីយ៍ឯក ជឹម សេងហុង ស្នងការរងនគរបាលខេត្តរួមនឹងសហការីបានចុះទៅផ្សព្វផ្សាយពីច្បាប់ និងផលប៉ះពាល់នៃគ្រឿងញៀន ព្រមទាំងគោលនយោបាយភូមិ-ឃុំមានសុវត្ថិភាពនៅក្រុងសួង ។
លោកនាយរងការិយាល័យកណ្តាលយុត្តិធម៌ខេត្តប្រាប់បន្តថា ខណៈចុះផ្សព្វផ្សាយនោះលោកស្នងការរងនគរបាលខេត្តបានឱ្យលេខទូរស័ព្ទដល់ប្រជាពលរដ្ឋ ពេលឃើញ ឬដឹងបទល្មើសណាមួយត្រូវចេះរាយការណ៍មកសមត្ថកិច្ចជាបន្ទាន់ ដើម្បីមានវិធានការចុះទប់ស្កាត់ ឬបង្ក្រាបឱ្យបានទាន់ពេលវេលា។ ជាក់ស្តែងវេលាម៉ោង១១ព្រឹកថ្ងៃទី២០ សីហា មានប្រជាពលរដ្ឋល្អបានទូរស័ព្ទទៅប្រាប់លោកជឹម សេងហុង ថា «មានហ្គេមមួយកន្លែងកំពុងតែពង្វក់ក្មេងៗនៅភូមិជ្រៃបិទមាស សង្កាត់សួង ក្រុងសួង ដែលបើកលួចលាក់លេងរាល់ថ្ងៃ។ ក្រោយពីទទួលបានព័ត៌មាននេះ ភ្លាមលោកក៏សុំគោលការណ៍ពីលោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តដើម្បីចុះបង្ក្រាបជាបន្ទាន់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ