ព្រឹត្តិការណ៍វាយកូនបាល់ Pan Pacific Openដែលមានទឹកប្រាក់រង្វាន់សរុប ២លាននិង១៦ម៉ឺនដុល្លារអាមេរិកសម្រាប់ឆ្នាំ២០១២នេះនឹងត្រូវរៀបចំធ្វើនៅទីក្រុងតូក្យូ ប្រទេសជប៉ុននាថ្ងៃទី២៣ខែកញ្ញាខាងមុខនេះ ។ យោងតាមអ្នករៀបចំការប្រកួតបានឱ្យដឹងថា នៅឆ្នាំនេះក្នុងចំណោមកីឡាការិនីកំពូលពិភពលោកទាំង១០រូបគឺមានតែ៩រូបប៉ុណ្ណោះដែលនឹងមកចូលរួមប្រកួតប្រជែងគ្នា ។
មន្ត្រីរៀបចំបានឱ្យដឹងកាលពីថ្ងៃចន្ទសប្តាហ៍នេះថា ម្ចាស់មេដាយមាសអូឡាំពិកក្រុងឡុងឆ្នាំ២០១២និងជាម្ចាស់ជើងឯកក្របខណ្ឌ Wimbledonគឺជាកំពូលកីឡាការិនីមួយរូបគត់ដែលអវត្តមានពីកម្មវិធីប្រកួតមានរយៈពេល៧ថ្ងៃនេះ ។ ដោយឡែកក្នុងចំណោមកំពូលកីឡាការិនីទាំង៩រូបដែលបានប្រកាសពីការចូលរួមក្នុងឆ្នាំនេះក៏មានម្ចាស់ជើងឯកក្របខណ្ឌ French Open ម៉ារីយ៉ា សារ៉ាប៉ូវ៉ាផងដែរ ។ កីឡាការិនីជាតិរុស្ស៊ីរូបនេះដែលដណ្តើមបានត្រឹមមេដាយប្រាក់ក្នុងព្រឹត្តិការណ៍កីឡាអូឡាំពិកក្រុងឡុងឆ្នាំ២០១២ធ្លាប់បានយកឈ្នះជើងឯក Pan Pacific Openចំនួន២លើកគឺនៅឆ្នាំ២០០៥ និងឆ្នាំ ២០០៩ ។
ក្រៅពីនេះ នាងវិចតូរីយ៉ា អាហ្សារិនកាដែលជាម្ចាស់ពានក្របខណ្ឌធំ Australian Open,កីឡាការិនីការពារជើងឯកអានីយ៉េស្កា រែដវ៉ាន់ស្កានិងម្ចាស់ពាននេះកាលពីឆ្នាំ២០១០នាង ការ៉ូលីន វ៉ូនីអាកគីសុទ្ធតែស្ថិតនៅក្នុងចំណោមអ្នកចូលរួមទាំង៩រូប ។
ចំណែកកីឡាការិនីវ័យ៤២ឆ្នាំរបស់ម្ចាស់ផ្ទះ Kimiko Date-Krummដែលបានឈ្នះពាននេះកាលពីឆ្នាំ១៩៩៥នឹងទទួលបានសិទ្ធិពិសេសក្នុងការចូលរួមនៅឆ្នាំនេះផងដែរ ៕
ចែករំលែកព័តមាននេះ