ខេត្តសៀមរាប ៖ នៅចន្លោះម៉ោងប្រមាណជា២ទៅដល់ម៉ោង៤រសៀលថ្ងៃទី១៥ សីហា ២០១២ កន្លងទៅ ខណៈឆ្លងកាត់បូរីរដ្ឋបាលខេត្ដដែលទទួលម៉ៅការសាងសង់ដោយក្រុមហ៊ុន “G&R” ដែលគេជឿជាក់ថា មានទំនាក់ទំនងជាមួយមន្ដ្រីមានអំណាច គេឃើញទ្វារមន្ទីររដ្ឋយ៉ាងតិចពីរអង្គភាព រួមមានមន្ទីរទំនាក់ទំនងព្រឹទ្ធសភារដ្ឋសភា និងអធិការកិច្ចខេត្ដ និងមន្ទីរឧស្សាហ៍កម្មរ៉ែ និងថាមពលត្រូវបានគេចាក់សោជាប់ពីខាងក្រៅ។ ចំណែកអង្គភាពរដ្ឋផ្សេងៗទៀត ដោយបូកបញ្ចូលទាំងសាលាខេត្ដផងដែរនោះ បើមើលពីខាងក្រៅកំពុង ស្ថិតក្នុងសភាពស្ងៀមស្ងាត់ គឺឃើញមាន តែម៉ូតូ និងឡានមិនលើសពី២គ្រឿងចតនៅពីមុខអគាររដ្ឋបាលនីមួយៗតែប៉ុណ្ណោះ។ ទិដ្ឋភាពស្ងៀមស្ងាត់នេះបានបញ្ជាក់យ៉ាងច្បាស់ថាមន្ដ្រីបំរើការនៅតាមមន្ទីររដ្ឋនានាបានខកខានធ្វើការងាររដ្ឋឱ្យគ្រប់ម៉ោង ។
សភាពស្ងៀមស្ងាត់កន្លែងធ្វើការងាររដ្ឋទាំងនោះត្រូវបានមន្ដ្រីមួយរូបបំរើការនៅក្នុងមន្ទីរមួយក្នុងចំណោមមន្ទីរអង្គភាពរដ្ឋសរុបចំនួន២៧ ដែលត្រូវបានផ្លាស់មកកាន់ទីតាំងបូរីរដ្ឋបាលនោះបង្ហើបឱ្យដឹងថា រឿងនេះ កើតមានរាប់ខែមកហើយចាប់តាំងពីគេមានការផ្លាស់ប្ដូរទីតាំងអង្គភាពរដ្ឋទាំងអស់ពីទីប្រជុំជនមកដាក់នៅក្នុងបូរីរដ្ឋបាលនេះរហូតមក។ មន្ដ្រីដដែលបន្ថែមថា អង្គភាពរដ្ឋស្ទើរទាំងអស់បានបើកទ្វារធ្វើការតែពេលព្រឹកប៉ុណ្ណោះ ចំណែកពេលរសៀលត្រូវបង្ខំចិត្ដបិទទ្វារ ដោយសារកន្លែងធ្វើការថ្មី «បូរីរដ្ឋបាល» ហ្នឹងវាឆ្ងាយពីទីប្រជុំជន គ្មានលទ្ធភាពចំណាយទៅលើថ្លៃសាំងម៉ូតូ ឡាន មកធ្វើការទាំងព្រឹកទាំងល្ងាចនោះទេ។
ប្រភពបន្ដទៀតថា ទីតាំងថ្មីនោះវាមានចំងាយរហូតដល់ជាង២០គីឡូម៉ែត្រ ពីក្រុងសៀមរាប បើគេទៅធ្វើការទាំងព្រឹក ទាំងល្ងាចត្រូវការជិះម៉ូតូ ឬរថយន្ដចំនួន៤ត្រឡប់ក្នុងមួយថ្ងៃៗដែលចំងាយសរុបរហូតដល់ជិត១០០គីឡូម៉ែត្រឯណោះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ