រាជធានីភ្នំពេញ ៖ រថយន្តម៉ាក SSANG YONGREXTON ពណ៌ខ្មៅ មួយគ្រឿង បើកដោយបុរសម្នាក់បានបើកថយក្រោយទៅបុកដើមស្នាយ២ដើម បណ្តាលឱ្យបាក់រៀបស្មើដល់ដី ពេលប៉ូលិសសួរនាំប្រាប់ថា ខឹងរ៉ឺម៉កម៉ូតូកង់៣ ពណ៌ក្រហម មួយគ្រឿង បើកដោយបុរសស្រវឹងម្នាក់បើកមកបុកគូទរថយន្តរបស់គាត់ ហើយព្យាយាមរត់គេចខ្លួន ទើបគាត់ថយដេញតាមចាប់ក៏ជ្រុលទៅបុកដើមស្នាយបាក់អស់២ដើមបែបនេះ ។
ហេតុការណ៍នេះកើតឡើងកាលពីវេលាម៉ោង៨និង៤៥នាទីយប់ថ្ងៃទី២០ សីហា ២០១២ តាមផ្លូវបេតុង២០០២ ស្ថិតក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ ជាប់របងផ្ទះលោកឡុង ម៉េង ។
យោងតាមសម្តីលោកហឿន វឿន នាយរងផ្នែកសណ្តាប់ធ្នាប់ចរាចរណ៍ជើងគោកខណ្ឌសែនសុខ ឱ្យដឹងថា មុនពេលកើតហេតុរថយន្តម៉ាក SSANG YONG REXTON ពណ៌ខ្មៅ បើកដោយបុរសម្នាក់តាមផ្លូវបេតុង២០០២ ក្នុងទិសដៅពីត្បូងទៅជើង ស្រាប់តែមកដល់មុខផ្ទះលោកឡុង ម៉េង ក៏មានរ៉ឺម៉កម៉ូតូកង់៣ ពណ៌ក្រហម មួយគ្រឿងបើកដោយបុរសស្រវឹងជោកម្នាក់ទៅបុកគូទរថយន្ត SSANG YONG REXTON ពណ៌ខ្មៅ នោះ បណ្តាលឱ្យក្រពឹតបន្តិចបន្តួច រួចព្យាយាមបើករត់គេចខ្លួនដោយបត់ត្រឡប់ក្រោយឃើញដូចនោះអ្នកបើកបររថយន្ត SSANG YONG REXTON ក៏ថយរថយន្តដើម្បីដេញតាមចាប់ក៏ជ្រុលចង្កូតទៅបុកដើមស្នាយ២ដើមដែរ ដាំជាប់របងផ្ទះ លោកឡុង ម៉េង បាក់រៀបស្មើដល់ដីត្រូវសន្តិសុខដែលយាមនៅផ្ទះរបស់លោកឃើញបានធ្វើការឃាត់ខ្លួន ដើម្បីប្រគល់ឱ្យសមត្ថកិច្ចខណ្ឌសែនសុខ យកទៅរក្សាទុកនៅ អធិការដ្ឋានខណ្ឌសែនសុខ រង់ចាំការដោះស្រាយ ចំណែករ៉ឺម៉កកង់៣បង្កហេតុបើករត់គេចខ្លួនដោយសុវត្ថិភាព ៕
ចែករំលែកព័តមាននេះ