Alejandro Valverde បានធ្វើឱ្យប្រិយមិត្តអ្នកគាំទ្រក្នុងស្រុកមានក្តីរំភើបជាខ្លាំងខណៈរូបគេបានយកឈ្នះដំណាក់ទី៣និងនាំមុខនៅលើតារាងថិរវេលាសរុបប្រណាំងកង់ក្របខណ្ឌធួ Tour of Spainនៅប្រទេសអេស្ប៉ាញកាលពីថ្ងៃចន្ទទី២០ខែសីហាកន្លងមកនេះ។
Valverdeដែលជាអ្នកជិះកង់ឱ្យក្រុមMovistar Teamបានយកឈ្នះដំណាក់ដែលមានចម្ងាយផ្លូវ១៥៥.៣គីឡូម៉ែត្រចេញដំណើរពីទីក្រុង Faustinoឆ្ពោះទៅកាន់ទីក្រុង Arrateប្រទេសអេស្ប៉ាញដោយប្រើអស់ថិរវេលា៣ម៉ោង៤៩នាទីនិង៣៧វិនាទីយកឈ្នះកីឡាករមិត្តរួមជាតិ Joaquin Rodriguezជិះឱ្យក្រុម Katusha Teamនិងបានយកឈ្នះកីឡាករអង់គ្លេស Christopher Froome ជិះឱ្យក្រុម Sky Procyclingដែលបានប្រើថិរវេលាស្មើៗគ្នា។
ថ្លែងបន្ទាប់ពីទទួលបានជ័យជម្នះកីឡាករValverdeបានបញ្ជាក់ថា៖«ខ្ញុំដឹងច្បាស់ពីស្ថានភាពផ្លូវប្រណាំងនៅទីនេះ ។ កាលពី៣ឆ្នាំមុន ខ្ញុំធ្លាប់បានជិះឡើងភ្នំនេះ។ ខ្ញុំគិតថាវាដល់វេនខ្ញុំឈ្នះម្តងហើយ។ នេះគឺជាជ័យជម្នះដ៏រឹងមាំដែលសក្តិសមបំផុត»។ ជ័យជម្នះលើកនេះសម្រាប់កីឡាករValverdeគឺពិតជាមានន័យខ្លាំងណាស់ដ្បិតវាបានជួយឱ្យរូបគេនាំមុខនៅលើតារាងថិរវេលាសរុបនិងគ្រងអាវកាក់ពណ៌ក្រហមទៀតផង។
ឆ្លងកាត់ការប្រណាំងចំនួន៣ដំណាក់មកនេះ កីឡាករ Valverdeបានប្រើអស់ថិរវេលាតិចជាងគេបំផុតគឺ៨ម៉ោងនិង៤៦នាទីនិង៥៦វិនាទីនាំមុខកីឡាករមិត្តរួមក្រុមនិងរួមសញ្ជាតិ Benat Intxausti Elorriagaដែលប្រើថិរវេលាច្រើនជាង ១៨វិនាទី ។ ចំណែកកីឡាករម្ចាស់ផ្ទះម្នាក់ទៀត Joaquin Rodriguezស្ថិតនៅលំដាប់ទី៣បន្ទាប់ពីបានប្រើពេលច្រើនជាង Valverde ១៩វិនាទី ។
សូមបញ្ជាក់ថាការប្រណាំងកម្មវិធី Tour of Spainឆ្នាំនេះចែកចេញជា២១ដំណាក់និងមានចម្ងាយផ្លូវសរុប៣៣៦០គីឡូម៉ែត្រ។ ដោយឡែកដំណាក់ទី៤ដែលជាដំណាក់បន្តមានចម្ងាយផ្លូវ១៦០.៦គីឡូម៉ែត្រចេញដំណើរពីទីក្រុង Baracaldo ឆ្ពោះទៅកាន់ទីក្រុង Estación de Valdezcaray ប្រទេសអេស្ប៉ាញ ៕
ចែករំលែកព័តមាននេះ