រាជធានីភ្នំពេញ ៖ បុរសម្នាក់ជានិស្សិតពេទ្យឆ្នាំទី៦ ត្រូវបានសមត្ថកិច្ចនគរបាលប៉ុស្តិ៍វាលវង់ ឃាត់ខ្លួនកាលពីព្រឹកថ្ងៃទី២០ សីហា ខណៈពេលជននេះ និងឪពុកចូលដាក់ពាក្យបណ្តឹងថា ត្រូវចោរប្លន់ម៉ូតូ១គ្រឿង ។ បុរសដែលសមត្ថកិច្ចឃាត់ខ្លួនឈ្មោះសិង្ហ វុទ្ធី អាយុ២៧ឆ្នាំ ស្នាក់នៅផ្ទះលេខ៤៣Eo ផ្លូវជាតិលេខ៥ សង្កាត់ឫស្សីកែវ ខណ្ឌឫស្សីកែវ ។
មន្ត្រីនគរបាលប៉ុស្តិ៍វាលវង់ ឱ្យដឹងថា នៅព្រឹកថ្ងៃខាងលើមានមន្ត្រីយោធាម្នាក់ជាឪពុកបាននាំកូនប្រុសឈ្មោះសិង្ហ វុទ្ធី មកប្តឹងសមត្ថកិច្ចថា ត្រូវចោរប្លន់ម៉ូតូនៅក្បែរអតីតរោងភាពយន្តគីរីរម្យ ។ ខណៈពេលបម្រុងដាក់ពាក្យបណ្តឹងត្រូវបាននគរបាលជំនាញប៉ុស្តិ៍វាលវង់ សួរនាំសភាពការណ៍ប្លន់នោះនៅម៉ោងប៉ុន្មាន ហើយជនល្មើសមានបក្សពួកប៉ុន្មាននាក់ ដើម្បីដាក់ការស្រាវជ្រាវ និងប្រកាសជាសាធារណៈឱ្យគោលដៅផ្សេងទៀតពិនិត្យលើជនសង្ស័យ ។ ពេលនោះយុវជនសិង្ហ វុទ្ធី បានរៀបរាប់ប្រាប់ប៉ូលិសប៉ុស្តិ៍ថា រូបគេត្រូវចោរ២នាក់ប្លន់យកម៉ូតូម៉ាកឌ្រីម C125 ពណ៌ខ្មៅ ស៊េរី២០១១ កាលពីវេលាម៉ោង៧និង៣០នាទីយប់ថ្ងៃទី១៩ សីហា នៅម្តុំរោងភាពយន្តគីរីរម្យ លុះពេលស្រាវជ្រាវពិតប្រាកដទៅ ទើបដឹងថា មិនមែនចោរប្លន់ទេ គឺចាញ់ល្បែង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ