ទីភ្នាក់ងារព័ត៌មានបរទេសបានផ្សាយឱ្យដឹងថា កីឡាករដេវីដ បេកខាំ ខ្សែបម្រើក្លិប Los Angeles Galaxy នៅតែទទួលប្រជាប្រិយក្នុងវ័យ៣៧ឆ្នាំ ក្រោយពីបង្ហើបឱ្យដឹងពីប្រាក់ចំណូលនៅក្នុងឆ្នាំ២០១១ កន្លងមកថា អាចរកចំណូលបានដល់ទៅ១៥,២លានផោន តាមរយៈក្រុមហ៊ុនហ្វុតវើក ខមភេនី របស់ខ្លួន ដែលមានតួនាទីទទួលខុសត្រូវផ្នែកផ្សព្វផ្សាយផលិតផល ដោយចំណូលខាងលើបេកខាំ បានជម្រះលើពន្ធនៅសល់១៣,៣លានផោន ។
ចាត់ទុកថា ជាប្រាក់ចំណូលច្រើនជាងឆ្នាំ២០១០ ដោយក្រុមហ៊ុនខាងលើអាចរកបាន១៤,៩លានផោន និងមានចំណូលសុទ្ធ១១,៦លានផោន ។ បច្ចុប្បន្នកីឡាករដេវីដបេកខាំ នៅទទួលការទំនាក់ទំនងឱ្យធ្វើជាភ្នាក់ងារផ្សព្វផ្សាយទំនិញដែលមានស្លាកយីហោល្បីៗ ដូចជាក្រុមហ៊ុនអាម៉ានី (Armani) ,អេឌីដាស (Adidas) ,សាំស៊ុង (Samsung) និងកូកា-កូឡា (Coca Cola) រួមទាំងផលិតផលទឹកអប់ផ្សព្វផ្សាយជាមួយប្រពន្ធវិកតូរីយ៉ា បេកខាំ និងមានកិច្ចសន្យារយៈពេលវែងជាមួយក្រុមហ៊ុនសម្លៀកបំពាក់យីហោ H&M ផងដែរ ។
ស្របពេលជាមួយគ្នានេះ ក្នុងរបាយការណ៍បានបញ្ជាក់ទៀតថា «តួលេខខាងលើជាសញ្ញាបង្ហាញថា ស្លាកយីហោបេកខាំ នៅមានសភាពរឹងមាំគ្មានប្រែប្រួល ទោះបីជាបេកខាំជិតលាឈប់ពីអាជីពបាល់ទាត់ក៏ដោយ ប៉ុន្តែនិមិត្តរូបរបស់គេនៅតែអាចរកចំណូលបាន ។ក្រៅពីនេះក៏មានការរំពឹងទុកថា ប្រាក់ចំណូលរបស់គេនៅក្នុងឆ្នាំ២០១២ នឹងច្រើនជាងឆ្នាំមុន ជាពិសេសអាចជាអំឡុងពេលដែលគេត្រូវប្រឡូកក្នុងមជ្ឈដ្ឋានបាល់ទាត់ជាលើកចុងក្រោយ» ។
ចែករំលែកព័តមាននេះ