អតិផរណាម្ហូបអាហារ នឹងប៉ះពាល់ដល់សេដ្ឋកិច្ចអាស៊ីនៅដំណាច់ឆ្នាំនេះ ប្រសិនបើតម្លៃឡើងខ្ពស់នាពេលបច្ចុប្បន្ននៅថេររហូតដល់ប៉ុន្មានខែខាងមុខ ក្នុងនោះប្រទេសវៀតណាម ចិន និងហុងកុង ទទួលរងផលប៉ះពាល់ខ្លាំងជាងគេបំផុត ។ចាប់តាំងពីពាក់កណ្តាលខែមិថុនាមក តម្លៃគ្រាប់ធញ្ញជាតិ ពោត សណ្តែកសៀង និងស្រូវសាឡី បានឡើងថ្លៃ៣៨% ពេលខ្លះ២៤% ហើយពេលខ្លះទៀតក៏ឈានដល់៤៥% បន្ទាប់ពីគ្រោះរាំងស្ងួតដ៏អាក្រក់ដែលបានធ្វើឱ្យខូចដំណាំជាច្រើនប្រភេទនៅអាមេរិក ។
បញ្ហាទាំងអស់នេះបានជំរុញឱ្យអង្គការសហប្រជាជាតិចេញនូវការព្រមានថា ពិភពលោកអាចប្រឈមមុខនឹងភាពភ័យខ្លាចដូចកាលពីឆ្នាំ២០០៨ ដោយសារតម្លៃស្បៀងឡើងខ្ពស់ជាបន្តបន្ទាប់ ។ នាពេលនោះ ក្រុមប្រទេស G20 បានជួបប្រជុំគ្នាដើម្បីពិភាក្សាស្វែងរកដំណោះស្រាយចំពោះតម្លៃស្បៀងដែលឡើងកប់ពពកបែបនេះ ។ ក្រុមសេដ្ឋវិទូមកពីធនាគារ Standard Chartered និយាយថា នៅពេលតម្លៃគ្រាប់ធញ្ញជាតិឡើងថ្លៃនៅទីក្រុងញូវយ៉កកាលពីថ្ងៃអង្គារដោយសារមានភ្លៀងធ្លាក់នៅតំបន់ខាងលិចនោះ តម្លៃគ្រាប់ធញ្ញជាតិនឹងបន្តស្ថិតកម្រិតមួយខ្ពស់ ។
លោក Tai Hui ប្រធានស្រាវជ្រាវក្នុងតំបន់សម្រាប់អាស៊ីនិយាយថា ប្រសិនបើតម្លៃស្បៀងចេះតែឡើងថ្លៃតទៅមុខទៀតនោះ តម្លៃម្ហូបអាហារពិភពលោកដែលឡើងថ្លៃនឹងប៉ះពាល់ខ្លាំងដល់អាស៊ីនៅក្នុងដើមឆ្នាំ២០១៣ ខាងមុខ ។ លោកបន្តថា វៀតណាម ចិន និងហុងកុង ជាប្រទេសដែលងាយរងគ្រោះបំផុត ព្រោះសន្ទស្សន៍តម្លៃទំនិញប្រើប្រាស់របស់ប្រទេសទាំងនោះមានទំនាក់ទំនងគ្នាជាមួយនឹងតម្លៃស្បៀងពិភពលោក ។ ចាប់តាំងពីថ្ងៃទី១៥ មិថុនា កន្លងមក សន្ទស្សន៍តម្លៃទំនិញប្រើប្រាស់កើនឡើងប្រហែល១០% ហើយគ្រាប់ធញ្ញជាតិ៣ប្រភេទគឺសណ្តែកសៀង ស្រូវសាឡី និងពោតកើន១៨% ។
សណ្តែកសៀងមានតម្លៃជាមធ្យម១៦ដុល្លារក្នុង១Bushel (1Bushel=25,40Kg) ស្រូវសាឡីមានតម្លៃ៨,៥០ដុល្លារក្នុង 1Bushel និងពោតមានតម្លៃ៧,៥០ដុល្លារក្នុង 1Bushel ។ ទ្វីបអាស៊ីបានជួបប្រទះនឹងវិបត្តិនេះម្តងរួចមកហើយកាលពីឆ្នាំ២០០៧-២០០៨ ដោយសារការខ្វះខាតស្បៀងអាហារ ជាពិសេសស្រូវតែម្តង។ អតិផរណាស្បៀងអាហារបានប៉ះពាល់តំបន់អាស៊ីធ្ងន់ធ្ងរជាងតំបន់ផ្សេងៗនៅលើពិភពលោក។ នៅក្នុងប្រទេសកំពុងអភិវឌ្ឍន៍ខ្លះនៅអាស៊ីតម្លៃទំនិញប្រើប្រាស់បានកើន៣៥% បើធៀបនឹងអាមេរិក និងអឺរ៉ុបមានតែ២០%ប៉ុណ្ណោះ នេះបើតាមការឱ្យដឹងរបស់មូលនិធិរូបិយវត្ថុអន្តរជាតិ ។ បណ្តាក្រុមសេដ្ឋវិទូប្រចាំស្ថាប័ន Nomura បានចេញសេចក្តីព្រមានពីអតិផរណាកាលពីសប្តាហ៍មុនថា ចលនាទំនិញឡើងថ្លៃនៅលើសាកលលោកអាចនឹងមានផលប៉ះពាល់ដល់អាស៊ីធ្ងន់ធ្ងរបំផុត ព្រោះសមាសភាពម្ហូបអាហារនៅក្នុងសន្ទស្សន៍តម្លៃទំនិញប្រើប្រាស់ធំពេក ។ តម្លៃស្បៀងអាហារគឺមានសារសំខាន់ជាងតម្លៃថាមពលនៅក្នុងការជំរុញឱ្យមានអតិផរណានៅអាស៊ី ពោលគឺវាធំជាងតម្លៃថាមពល២ទៅ៣ដងឯណោះ ។ លោក Rob Subbarman សេដ្ឋវិទូជាន់ខ្ពស់នៅអាស៊ីនិយាយថា ប្រសិនបើតម្លៃទំនិញប្រើប្រាស់ឡើងខ្ពស់ចំពេលដែលកំណើនសេដ្ឋកិច្ចពិភពលោកធ្លាក់ចុះនោះ អតិផរណានៅអាស៊ីនឹងកើនដល់៤,៣%នៅក្នុងត្រីមាសទី៤ និងឡើងដល់៥,៦%នៅក្នុងត្រីមាសទី២ឆ្នាំ២០១៣ ខាងមុខ ។ ក្នុងនោះហុងកុង នឹងស្ថិតនៅក្នុងចំណោមប្រទេសដែលមានតម្លៃទំនិញប្រើប្រាស់ឡើងថ្លៃជាងគេ ៕
ចែករំលែកព័តមាននេះ