ខេត្តបន្ទាយមានជ័យ ៖ កាលពីព្រឹកថ្ងៃទី១៨ សីហា ឆ្នាំ២០១២ នៅទីលានបាល់ទាត់ខេត្តបន្ទាយមានជ័យ មានរៀបចំពិធីបើកការប្រកួតកីឡាមហាជនជ្រើសរើសជើងឯកភូមិភាគប្រចាំឆ្នាំ២០១២ ក្រោមអធិបតីភាពលោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា និងលោកចុង ផែត អភិបាលរងខេត្តបន្ទាយមានជ័យ ។
លោកចុង ផែត បានមានមតិស្វាគមន៍ និងបានថ្លែងអំណរគុណដល់រាជរដ្ឋាភិបាល ក៏ដូចជាក្រសួងអប់រំ យុវជន និងកីឡា ដែលបានផ្តល់កិត្តិយសឱ្យខេត្តបន្ទាយមានជ័យធ្វើជាម្ចាស់ផ្ទះក្នុងការរៀបចំការប្រកួតកីឡាមហាជនជ្រើសរើសជើងឯកភូមិភាគប្រចាំឆ្នាំ២០១២នេះ ។ លោកបានលើកឡើងពីវិស័យកីឡានៅខេត្តបន្ទាយមានជ័យថា មានការរីកចម្រើនគួរឱ្យកត់សម្គាល់ដូចជាបាល់ទាត់ បាល់បោះ និងប្រដាល់ជាដើម ដោយសារមានការយកចិត្តទុកដាក់ពីអាជ្ញាធរ ស្ថាប័ន មន្ទីរពាក់ព័ន្ធនានា ក៏ដូចជាសប្បុរសជនបានចូលរួមឧបត្ថម្ភ ។ ជាក់ស្តែងផ្នែកបាល់ទាត់ ត្រូវបានលោកនាយឧត្តមសេនីយ៍សៅ សុខា អគ្គមេបញ្ជាការរងនៃកងយោធពលខេមរៈភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស យកចិត្តទុកដាក់គាំទ្រ និងឧបត្ថម្ភយ៉ាងពេញទំហឹង ។
លោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា មានមតិសំណេះសំណាលផ្តាំផ្ញើដល់កីឡាករទាំងអស់ធ្វើយ៉ាងណាត្រូវខិតខំយកចិត្តទុកដាក់លើការប្រកួតឱ្យទទួលបានជោគជ័យដើម្បីខេត្តរបស់ខ្លួន ហើយកីឡានាំមកនូវសុខភាព សាមគ្គីភាព និងត្រូវចូលរួមទាំងអស់គ្នាលុបបំបាត់គ្រឿងញៀន ។ លោកអនុរដ្ឋលេខាធិការបានបន្តថា ការប្រកួតកីឡាមហាជនជ្រើសរើសជើងឯកភូមិភាគប្រចាំឆ្នាំ២០១១២នៅខេត្តបន្ទាយមានជ័យនេះ គឺមាន៥ខេត្តក្នុងភូមិភាគចូលរួមមានខេត្តបន្ទាយមានជ័យ ខេត្តពោធិ៍សាត់ ខេត្តបាត់ដំបង ខេត្តប៉ៃលិន និងខេត្តសៀមរាប លើវិញ្ញាសាចំនួន៤គឺ បាល់ទះ បាល់ទាត់ បាល់បោះ និងអត្តពលកម្ម ដែលមានទាំងអស់៤២ប្រកួត និងរយៈពេល១៥ថ្ងៃគឺចាប់ពីថ្ងៃទី១៥ សីហា ឆ្នាំ២០១២ តទៅ ៕
ចែករំលែកព័តមាននេះ