រាជធានីភ្នំពេញ ៖ ទីបំផុតគេបានរកឃើញក្រុមចំនួន៤ ដែលបានឆ្លងផុតពីវគ្គប្រកួតជម្រុះ៨ក្រុមចុងក្រោយ និងត្រូវត្រៀមឡើងទៅប្រកួតនៅវគ្គ១/២ផ្តាច់ព្រ័ត្រជាបន្តទៀត ក្នុងព្រឹត្តិការណ៍ប្រកួតបាល់ទាត់ពានរង្វាន់ Acleda John Brisden Cup 2012 កាលពីថ្ងៃសៅរ៍ ទី១៨ សីហា កន្លងមកនេះ ។
ការប្រកួតជម្រុះក្នុងវគ្គ៨ក្រុមចុងក្រោយនេះមានទាំងអស់៤ប្រកួត ក្នុងនោះ២ប្រកួតលេងនៅទីលានពហុកីឡដ្ឋានជាតិ និង២ប្រកួតទៀតលេងនៅទីលានបាល់ទាត់ខេត្តសៀមរាប ។ ការប្រកួតនៅលើទីលានពហុកីឡដ្ឋានជាតិ ក្រុមសាខាកំពង់ស្ពឺ លត់ក្រុមការិយាល័យកណ្តាលក ក្នុងលទ្ធ ផល ២-០ ខណៈក្រុមសាខាស្រីសន្ធរ បំបាក់ក្រុមសាខាព្រៃឈរ ៣-១ ។
នៅក្នុងតង់ទី១ ក្រុមសាខាកំពង់ស្ពឺរកបាន២គ្រាប់ នាំមុខមុនដោយកីឡាករ ឃឹម សុខនាង ពាក់អាវលេខ១៣ នៅនាទីទី៦ និងកីឡាករ ឯម សុខផាណា ពាក់អាវលេខ២៥ នៅនាទីទី២៥ ។ ចូលដល់តង់ទី២ ក្រុមការិយាល័យកណ្តាលក បានលេងវាយបកវិញ ប៉ុន្តែមិនមានឱកាសស៊ុតបាល់បញ្ចូលទីបានសម្រេចឡើយ ធ្វើឱ្យក្រុមការិយាល័យកណ្តាលក ត្រូវហាលអាវនៅត្រឹមវគ្គ៨ក្រុមចុងក្រោយនេះ ។
រីឯការជួបគ្នារវាងក្រុមសាខាស្រីសន្ធរ និងសាខាព្រៃឈរវិញ នៅតង់ទី១ ក្រុមសាខាស្រីសន្ធររកបាន២គ្រាប់នាំមុខមុន ។ កីឡាករ សែម មករា ពាក់អាវលេខ១២ រកបាន១គ្រាប់នៅនាទីទី៣២ និងកីឡាករ សំ សីហា ពាក់អាវលេខ៩ រកបាន១គ្រាប់ទៀតនៅនាទីទី៣៦ ។ ចូលដល់តង់ទី២ កីឡាករ រៀល គីហេង ពាក់អាវលេខ១៨ របស់ក្រុមសាខាស្រីសន្ធរ រកបានគ្រាប់ទី៣ នៅនាទីទី៦០ ។ លុះដល់នាទីទី៦៥ កីឡាករ ឆាត ចំណាន ពាក់អាវលេខ១៨ ដែលជាខ្សែប្រយុទ្ធរបស់ក្រុមសាខាព្រៃឈរបានទាត់បាល់ពិន័យប៉េណាល់ទីបានសម្រេច១គ្រាប់វិញ ។
ដោយឡែកសម្រាប់ការប្រកួតនៅលើទីលានបាល់ទាត់ខេត្តសៀមរាបឯណោះវិញ ក្រុមសាខាកំពង់ត្របែក បានលត់ក្រុមសាខាបាត់ដំបង ៤-១ និងក្រុមសាខាមានជ័យ បានបំបាក់ក្រុមសាខាសៀមរាបម្ចាស់ផ្ទះក្នុងលទ្ធផល ៥-២ ។ ពេលនេះគេអាចដឹងបានហើយថា ក្រុមបាល់ទាត់ចំនួន៤ដែលមានសំណាងបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀត គឺក្រុមសាខាកំពង់ស្ពឺ ក្រុមសាខាស្រីសន្ធរ ក្រុមសាខាកំពង់ត្របែក និងក្រុមសាខាមានជ័យ ៕
ចែករំលែកព័តមាននេះ