រាជធានីភ្នំពេញ ៖ ការទន្ទឹងរង់ចាំទស្សនាការប្រកួតកីឡាប្រដាល់នៅលើសង្វៀនស្ថានីយទូរទស្សន៍បាយ័នដែលមហាជនគិតថានឹងបានឃើញការប្រកួតរវាងកីឡាករជើងខ្លាំងពីររូបគឺ ចាន់ រតនា និងឯម ខ្លឹមខ្មៅ កាលពីថ្ងៃសៅរ៍សប្តាហ៍កន្លងទៅនេះ ត្រូវបានរំសាយទៅវិញយ៉ាងតក់ក្រហល់ដោយសារតែកីឡាករជើងខ្លាំងទាំង២រូបនោះបានអវត្តមាន ។ មន្ត្រីរៀបចំកម្មវិធីប្រដាល់ប្រចាំស្ថានីយទូរទស្សន៍បាយ័ន បានប្រាប់កោះសន្តិភាពថា ការអវត្តមានរបស់កីឡាករទាំង២រូបនេះបានធ្វើឡើងតែប៉ុន្មានម៉ោងប៉ុណ្ណោះមុនពួកគេឡើងរេញ ទើបគណៈកម្មការរៀបចំការប្រកួតដាក់កីឡាករផ្សេងឱ្យប្រកួតជំនួសវិញ ។
លោកនាង ស៊ីវុត្ថា អ្នករៀបចំកម្មវិធីប្រដាល់ប្រចាំស្ថានីយទូរទស្សន៍បាយ័នបានថ្លែងប្រាប់ពីការប្រែប្រួលជុំវិញអវត្តមានកីឡាករជើងខ្លាំងទាំង២រូបនេះថា «ចំពោះកីឡាករចាន់ រតនា គាត់ប្រាប់ថា រវល់មកមិនបាន ។ ការប្រែប្រួលនេះខាងខ្ញុំអ្នករៀបចំកម្មវិធីមិនចង់ឱ្យអ្នកទស្សនាមានការខកបំណងឡើយ ។ ម្យ៉ាងវិញទៀតខ្ញុំដែលជាអ្នករ៉ាប់រងភារកិច្ចនេះក៏មិននឹកស្មានដល់ដែរ» ។ លោកបញ្ជាក់ថា ចំពោះការអាក់ខានមិនបានចូលរួមប្រកួតរបស់ចាន់ រតនា និងឯម ខ្លឹមខ្មៅ ខាងក្លិបរបស់ពួកគេក៏ដូចជាខាងសហព័ន្ធបានជម្រាបយើងប៉ុន្មានម៉ោងមុនពេលការប្រកួតចាប់ផ្តើមដែរ ដូច្នេះហើយទើបយើងរៀបចំទាន់ពេលវេលាដាក់កីឡាករដែលមានក្បាច់ប្រដាល់ប្រហាក់ប្រហែលគ្នាជំនួស ធ្វើឱ្យមហាជនមិនខកចិត្តពេកទេក្នុងនោះវ៉ែន សុវណ្ណ ត្រូវប្តូរមកប៉ះជ័យ កុសល និងផល សោភ័ណ ត្រូវវិលមកប៉ះវ៉ាន់ ចាន់វ៉ៃ ដោយសារតែពួកគេមានទម្ងន់ និងកម្ពស់ប្រហែលគ្នា ។
យោងតាមប្រភពពីក្រុមកីឡាករបានឱ្យដឹងថា ចាន់ រតនា ដែលអាក់ខានមិនបានមកប្រកួតនេះដោយសារតែរូបគេទើបតែឡើងកូដក្លាយជាតារាសម្តែង ហើយនាល្ងាចថ្ងៃសៅរ៍ទី១៨ សីហា នោះ លោកជាប់រវល់ថតខ្សែភាពយន្តឱ្យផលិតកម្មមួយ ទោះបីជាយ៉ាងណា លោកបានជូនដំណឹងដល់ស្ថាប័នដែលគ្រប់គ្រប់កម្មវិធីនេះដែរ។ ដូចគ្នានេះដែរ អ្នកប្រដាល់ចិត្តធំមិនចេះខ្លាចឯម ខ្លឹមខ្មៅ ក៏បានអះអាងដោយផ្ទាល់នៅចំពោះមុខភ្នាក់ងារកោះសន្តិភាពយើងថា «លោកនៅតែចង់ប្រកួតជាមួយកីឡាករផល សោភ័ណ មកពីក្លិបតាឡីដំរីមានឫទ្ធិ ជានិច្ច គឺមិនចង់ប្តូរមកប៉ះជាមួយគូផ្សេងឡើយ ។ លោកអត់ខ្លាចទេ ប៉ុន្តែនេះវាបានប្រែប្រួលបាត់ទៅហើយ ដោយខ្ញុំត្រូវប្តូរទៅប្រកួតជាមួយកីឡាករហ៊ឹម សារ៉ាន់ មកពីក្លិបក្រសួងការពារជាតិ នាថ្ងៃអាទិត្យសប្តាហ៍នេះវិញ រីឯផល សោភ័ណ នៅតែមានវត្តមានដដែល ដោយត្រូវប៉ះជាមួយចាន់វ៉ៃ ព្រោះឮថាពួកគេមានកម្ពស់ប្រហាក់ប្រហែលគ្នា» ។
ទោះជាយ៉ាងណាក៏ដោយ កីឡាករឯម ខ្លឹមខ្មៅ ដែលមានប្រភពចេញមកពីខេត្តបាត់ដំបង បានសន្យាថា នឹងប្រឹងប្រែងបញ្ចេញស្នៀតប្រដាល់ពេលជួបប្រកួតជាមួយកីឡាករហ៊ឹម សារ៉ាន់ មិនឱ្យទស្សនិកជនខកចិត្តឡើយ ព្រោះខ្លួនបានត្រៀមរួចហើយសម្រាប់ក្បាច់ប្រដាល់ប្លែកៗដែលលោកបានហាត់ចេះថ្មីៗមកបង្ហាញអ្នកគាំទ្រដើម្បីប៉ះប៉ូវការខកខាន ។ទោះជាកីឡាករជើងខ្លាំងចាន់ រតនា និងឯម ខ្លឹមខ្មៅ អវត្តមានមែនក៏ខាងទូរទស្សន៍បាយ័នមិនបានធ្វើឱ្យមជ្ឈដ្ឋានមហាជនមានការខកចិត្តឡើយ ផ្ទុយទៅវិញរឹតតែធ្វើឱ្យមានការទាក់ទាញដោយសារតែកីឡាករជ័យ កុសល និងវ៉ែន សុវណ្ណ ក៏ជាជើងខ្លាំងដែលមហាជនចង់មើលការប្រកួតរវាងពួកគេទាំង២នាក់ដែរ ។ ការប្រកួតរវាងជ័យ កុសល មកពីក្លិបសិង្ហកីឡា និងវែ៉ន សុវណ្ណ មកពីក្លិបកងកេងមានឫទ្ធិខេត្តបាត់ដំបង នៅពីរទឹកដំបូងពួកគេវាយរបៀបស្ទាបស្ទង់កម្លាំងគ្នាប៉ុណ្ណោះ ។ លុះចូលដល់ទឹកទី៣ និងទី៤ កុសល ហាក់មានប្រៀបជាងដោយបានវាយកែងចំចិញ្ចើមខាងឆ្វេងរបស់សុវណ្ណ បណ្តាលឱ្យបែកចេញឈាមតែសុវណ្ណនៅតែអាចប្រកួតបន្តទៀតបាន ។ នៅទឹកទី៥ ទោះជាសុវណ្ណហាក់មានប្រៀបជាងកុសលបន្តិចវិញ តែទីបំផុតនៅតែចាញ់ពិន្ទុជ័យ កុសល ដដែល ។
សម្រាប់គូផ្សេងទៀត កីឡាករផាន់ សារ៉ែម មកពីក្លិបគជសារកីឡា បានបង្ខំឱ្យកីឡាករសាន សារុំ មកពីក្លិបកងទ័ពជើងគោក បោះបង់ការប្រកួតត្រឹមទឹកទី៣ ។ ចំណេកកីឡាការិនី សូយ សុធា មកពីក្លិបអូដឹមកីឡា បានប្រកួតឈ្នះកីឡាការិនីញឹម ចំរ៉ុង មកពីក្លិបពន្លឺសាមគ្គីខេត្តបាត់ដំបង នៅទឹកទី៣ ដោយអាជ្ញាកណ្តាលបញ្ឈប់ការប្រកួតដោយសារកីឡាការិនីញឹម ចំរ៉ុង ត្រូវរាប់ច្រើនដងពេក ។ រីឯកីឡាករចាន់ មុន្នី មកពីក្លិបនិរោធមានជ័យ ឈ្នះពិន្ទុកីឡាករអាន សុផល មកពីក្លិបរស្មីកុមារកំព្រា និងកីឡាករម៉ាប់ ឆៃយ៉ា មកពីក្លិបបក្សីស្លាបដែក បានយកឈ្នះយ៉ាម ពិសិដ្ឋ មកពីក្លិបរស្មីកុមារកំព្រា ដោយពិន្ទុ ៕
ចែករំលែកព័តមាននេះ